Policia gjermane ka konfirmuar se tetë persona kanë vdekur nga të shtënat në Hamburg, duke përfshirë edhe një kamikaz të dyshuar.
Sulmuesi nga Hamburgu që vrau tetë persona në një qendër të “Dëshmitarëve të Jehovait” ishte edhe vetë pjesëtar i këtij komuniteti, shkruan gazeta “Spiegel”, përcjell Fol Drejt.
Sulmuesi ishte midis 30 dhe 40 vjeç dhe nuk njihej nga autoritetet si ekstremist.
Ndërkohë, policia gjermane po përpiqet të përcaktojë motivin e sulmuesit, i cili besohet se ka vepruar i vetëm në kishën e Dëshmitarëve të Jehovait në Hamburg.
Grupi “Dëshmitarët e Jehovait” njoftoi se disa persona mbetën të plagosur rëndë.
“Lajm i keq nga Hamburgu”, shkroi kancelari gjerman Olaf Scholz në Twitter, duke e përshkruar sulmin si një “akt brutal dhune”.
Ai tha se mendimet e tij janë me viktimat, familjet e tyre dhe pjesëtarët e forcave të sigurisë të cilët që nga mbrëmë kanë bërë përpjekje të mëdha për zbardhjen e krimit.
Ministrja e Brendshme Nensi Fezer ka shkruar në “Twitter” se po zhvillohet një hetim urgjent për këtë krim.
Policia tha mbrëmë vonë se besonte se kishte vetëm një autor.
Grupi “Dëshmitarët e Jehovait” njoftoi në faqen e tij se ky komunitet fetar është prekur thellë nga sulmi i tmerrshëm ndaj besimtarëve të tyre në Hamburg pas shërbesës.
Ky grup shprehu ngushëllimet e tij për viktimat, familjet dhe “dëshmitarët e traumatizuar”. /FolDrejt/
