Vendet ballkanike vuanin nga zhvillimi ekonomik, kurse kohëve të fundit për shkak edhe të emigrimit masiv dhe uljes së natalitetit, kjo është përkeqësuar edhe më tepër, shkruajnë mediat ndërkombëtare.
Veçanërisht keq shkon me ekonominë kroate, ku përveç largimit të madh të të rinjve drejt Gjermanisë, zvogëlimit të lindjeve, tregu i saj i punës është plot vende të lira.
“Tani Kroacia po kërkon ndihmë (forcë punëtore) në Azi,” përcjell foldrejt.com, shkrimin e zviceranes srf.ch.
Në fakt rasti kroat është i veçantë. Në kohën kur nuk ka vende të lira pune në industri ose shtet, vende mjaft të lira shfaqen gjatë sezonës turistike. Dubrovniku dhe Spliti po presin numër rekord turistësh, por nuk ka kush t’ju shërbejë.
Deri tani Kroacia ka marrë shumë punëtorë nga Bosnja, Serbia dhe Mali i Zi.
Përveç sektorit të turizmit, Kroacia ka problem edhe në ndërtimtari. Kjo përkundër që rroga e mjeshtërve të ndërtimit është rritur me 40 përqind vetëm gjatë dy viteve të fundit.
Tashmë qeveria kroate kërkon që përmes Indisë, Pakistanit dhe Bangladeshit të thith punëtorë të rinj për të mbuluar zbrazëtirat në sektorin turistik dhe të ndërtimtarisë.
Ky është një mesazh sesi ‘bota rrotullohet’. Në valën e refugjatëve policia kroate dhunonte dhe plaçkiste emigrantët që futeshin ilegalisht në territorin e tyre. Kryesisht ishin pakistanezë. Tani vetë qeveria kroate kërkon punëtorë nga Pakistani./Foldrejt.com
