Për të pestën ditë me radhë qytetarët serbë të veriut do të bëjnë protestë duke kërkuar tërheqjen e kryetarëve të rinj, bashkë me forcat policore, shkruan Fol Drejt.
Protestat po mbahen në Zveçan, Zubin Potok dhe Leposaviq.
Kërkesat e tyre janë që këta kryetarë, të dalë nga zgjedhjet e 23 prillit, të tërhiqen nga komunat me shumicë serbe, ashtu si edhe njësitet speciale të Policisë së Kosovës.
Kryeministri i Republikës së Kosovës Albin Kurti, ka thënë se nuk do t’ua lë në dorë huliganëve, duke insistuar në të drejtën dhe legjitimitetin e kryetarëve të zgjedhur.
Nga konfrontimi i forcave të KFOR-it me protestues të dhunshëm, mbetën të lënduar dhjetëra pjesëtarë të kësaj force.
Policia e Kosovës dje njoftoi se protesta ishte e qetë fillimisht por në orët e pasdites në intervale të ndryshme kohore disa persona të dyshuar kanë hedhur gurë në drejtim të tri automjeteve të Policisë së Kosovës, ku dy prej tyre iu janë shkaktuar dëme materiale duke iu thyer xhamat. Si pasojë e sulmeve nga mjetet e forta një zyrtar policorë ka pësuar lëndime.
“Po ashtu gjatë protestës së realizuar sot, disa media/gazetarë janë penguar e sulmuar, si dhe automjetet e tyre ishin vandalizuar nga individ/grupe kriminale. Pengimi i gazetarëve në detyrë cenon të drejtën e shprehjes, informimit dhe lirinë e shtypit”, njoftoi policia.
Ua kujtojmë se serbët në veri kanë filluar protestën të premten (26 maj)./FolDrejt/
