Kandidati për presidencën e Turqisë, Kemal Kilicdaroglu, ka marrë sot mbështetjen e krahut të djathtë Ümit Özdag dhe Partisë së tij, në prag të raundit të dytë të zgjedhjeve që do të mbahet të dielën. Ozdag me këtë rast ka shpjeguar arsyet e mbështetjes së liderit të opozitës turke, raporton Klix, përcjell Fol Drejt.
Ndër të tjera, Ozdag theksoi se partia e tij do të mbështesë Kilicdaroglu dhe Partinë e tij Republikane Popullore dhe tha se është një aleancë që është ideologjikisht më afër partisë së tij.
Gjithashtu, Özdag tha se në të ardhmen, nëse Kilicdaroglu e fiton mandatin, do të dëshironte të merrte drejtimin e Ministrisë së Punëve të Brendshme.
“Sigurisht që e dua. E dëshiron edhe partia ime. Ne folëm me zotëri Kemalin. Ajo që është e rëndësishme për ne është ruajtja e parimeve themelore të Republikës, politika e zbatuar që do të mbrojë efektivisht ekzistencën e shtetit në lufta kundër terrorizmit, lëvizjes FETO, PKK-së dhe ISIL. Kjo politikë i referohet edhe dërgimit të 13 milionë refugjatëve në atdheun e tyre”, tha Ozdag.
Përveç kësaj, Özdag dërgoi një mesazh për të gjithë votuesit përpara zgjedhjeve.
“Thirrja ime drejtuar turqve, pavarësisht se cilës parti favorizojnë. A doni që 13 milionë refugjatë të qëndrojnë në Turqi apo jo? A doni t’u jepni paratë tuaja azilkërkuesve dhe pastaj të prisni pas tyre në spital? A doni që ne të shpenzojmë 11 miliardë dollarë në vit që sirianët të marrin ilaçe falas?” tha ai.
Raundi i dytë i zgjedhjeve presidenciale në Turqi do të mbahet më 28 maj dhe për presidencën do të garojnë njeriu i parë aktual i shtetit, Rexhep Tajip Erdogan dhe lideri i opozitës së bashkuar, Kemal Kiliçdaroglu.
Në raundin e parë të zgjedhjeve, Erdogan fitoi 49.52 për qind të votave, ndërsa Kilicdaroglu mori besimin e 44.88 për qind të qytetarëve turq.
Kandidati i tretë presidencial, Sinan Ogan, i cili fitoi 5.17 për qind të votave në raundin e parë të zgjedhjeve, njoftoi se do t’i jepte mbështetjen e tij Recep Tayyip Erdogan në raundin e dytë dhe u bëri thirrje mbështetësve të tij që të votojnë për presidentin aktual të Turqisë në raundin e dytë të zgjedhjeve. /FolDrejt/
