Deputetja nga radhët e Aleancës për Ardhmërinë e Kosovës Time Kadrijaj e ka kritikuar mënyrën e paligjshme të seleksionimit dhe përzgjedhjes së ambasadorëve, shkruan Fol Drejt.
Në një Konferencë për media, Kadriaj këto faje ia ka veshur Komisionit për Politikë të Jashtme dhe Diasporë, ku ajo vetë është anëtare.
Sipas saj, në disa raste gjatë përzgjedhjes, në mungesë të prezencës fizike, kryetari i këtij komisioni, Haki Abazi, i ka telefonuar deputetët për të shprehur votën e tyre.
Ajo i përmendi edhe disa raste konkrete, ku janë shfrytëzuar këto mënyra, si në rastin e përzgjedhjes të të propozuarit për Konsull në New York Blerim Reka, e gjithashtu edhe gjatë votimit të kandidatit për ambasador në Kroaci Martin Berishaj.
Por kjo çështje sipas saj, nuk do të përfundojë me kaq, meqë AAK i është drejtuar Kryesisë së Kuvendit, Zyrës Ligjore të këtij institucioni, si dhe do të përgatitet një padi në Gjykatë./FolDrejt/
