Ish-Presidenti i Shteteve të Bashkuara të Amerikës, George Bush, në vitin 1991 u kërkonte autoriteteve të ish-Jugosllavisë të mos e përdornin forcën e kërcënimet që cënonin të drejtat njerëzore. Këtë mesazh ish-presidenti amerikan e kishte dërguar përmes ambasadorit, Warren Zimermann që kishte takuar ish-kryetarin e qeverisë federative së atëhershme, Ante Marković.
Shkrimi i plotë i botuar në të përditshmen e kohrave të atëhershme në Gazetën Liria më 21 Mars 1991.
I nderuar zoti kryetar, ngjarjet në Jugosllavi jam duke i ndjekur me brengosje të madhe. Më lejoni që, në këto momente të vështira përsëri të theksoj se e mbështeti programin tuaj të reformave politike dhe ekonomike të cilat janë në dobi të të gjithëve në Jugosllavi. Jam i bindur se Bashkësia Ndërkombëtare edhe më tutje, në mënyrë konkrete do ta përkrahë Jugosllavinë, nëse ajo i zhvillon dhe i çon përpara ato në përputhje me reformat e parashikuara.
Si keni njoftuar, Këshilli Ekzekutiv, Federativ dhe Kryesia e RSFJ-së, problemet politike, ekonomike dhe konfliktet ndërnacionale në Jugosllavi do t’i zgjidhin në mënyrë demokratike nëpërmjet reformave dhe në mënyrë paqësore. Shtetet e Bashkuara me vendosmëri e kundërshtojnë përdorimin e forcës si dhe kërcënim që i pengon ndryshimet demokratike ose imponon sistem jodemokratik në Jugosllavi.
Duhet të jetë plotësisht e qartë që Shtetet e Bashkuara nuk e favorizojnë as një komb a kombësi në Jugosllavi. Dëshirojmë që mosmarrëveshjet midis popujve të mënjanohen në kuadrin Jugosllavisë së përbashkët dhe demokratike. Pra, nuk do t’i përkrahim dhe nuk do t’i shpërblejmë ata të cilët dëshirojnë ta shkatërrojnë shtetin.
Viteve të fundit në Europë janë bërë ndryshime të papritura. Konfrontimi ushtarak është zhdukur, gjithkund, më shumë po respektohet liria, demokracia dhe dinjiteti i njeriut. Epoka e luftës së ftohtë është zëvendësuar me epokën e negociatave, të bashkëpunimit dhe bisedimit. Prandaj, do të ishte tragjike nëse Jugosllavia nuk do të mund të kuptonte se çfarë mundësish i ofron momenti i tanishëm historik për krijimin e bazave të reja për unitetin demokratik dhe për të hyrë në europën si tërësi e lirë.
Sinqerisht dëshirojmë që të ruajmë marrëdhëniet e ngushta dhe të dobishme që kanë një traditë të gjatë ndërmjet shteteve tona.
I juaji, George Bush!
_____________________________
©FolDrejt/ Burimi: Gazeta Liria
