Kriza energjetike e ka shtyrë kryeopozitarin Lumir Abdixhiku që ta sulmoj ashpër Kryeministrin e Republikës së Kosovës Albin Kurti, duke e cilësuar atë dhe kabinetin e tij, si të paaftë për ta nxjerr vendin nga kjo situatë, transmeton Fol Drejt.
Për më shumë, kryetari i Lidhjes Demokratike të Kosovës (LDK), tha në parlament se Kryeministri Kurti duhet ta dijë se çmimi i rrymës kontraktohet, rezervohet “e nëse nuk e di si inxhinier ai duhet ta kthejë diplomën e tij në fakultet.”
Por këtij i është kundërpërgjigjur vetë profesori i Kurtit, Agni Dika. Ai në ndër të tjera ka theksuar faktin që kryeministri ka qenë njëri ndër studentët e tij më të mirë, gjatë gjithë karrierës së tij mbi 45 vjeçare në universitet.
Ky është reagimi i tij i plotë:
Të nderuar miq,
Nuk mundem të mos reagoj kur dëgjoi të tillë që e nënçmojnë diplomën e z. Albin Kurti, kur e dijë se ka qenë absolutisht njëri ndër studentëve më të mirë të cilëve u kam mbajtur mësim, gjatë punës time mbi 45 vjeçare në Universitet.
Albin Kurti është inxhinier i Diplomuar në Fakultetin e Inxhinierisë Elektrike dhe Kompjuterike të Universitetit të Prishtinës, ku e ka mbrojtur punimin e diplomës në Departamentin e Kompjuterikës, në të cilin niveli i studimeve është i krahasueshëm ma ato të universitete evropiane, gjë që dëshmohet edhe me punësimin e të gjithë të diplomuarve, kryesisht jashtë vendit.
Meqë gjatë studimeve, z. Albin Kurti i kam dhënë mësim në tre lëndë, shumë mirë më kujtohen provimet e tij me shkrim, të shkruar me stilograf dhe ngjyrë të zezë, si dhe notat maksimale 10 me të cilat janë vlerësuar, pa pasur qoftë edhe një gabim të vetëm.
Gjithashtu, kam qenë anëtar i komisionit për mbrojtjen e punimit të tij të diplomës, i cili ndërlidhej me një tip të veçantë të memorieve kompjuterike. Materiali i përfshirë në diplomë i ngjante një punimi të vërtetë shkencor. Duke e pasur parasysh përmbajtjen e punimit, përgjigjet në të gjitha pyetjet e shtruara, mbrojtja e diplomës njëzëri është vlerësuar me notën maksimale 10.
Të gjithë atyre që mundohen ta nënçmojnë z. Albin Kurti, për ta krahasuar nivelin e tyre, do të ishte mirë ta ndjekin intervistën e tij në BBC (HARDtalk), duke klikuar në linkun vijues, për të parë se si përgjigjet në pyetjet të cilat kryesisht u përngjajnë atyre të gazetarëve dhe politikanëve serb”. /FolDrejt/
