Shou Zi Chew, drejtori i rrjetit social TikTok, do të flasë para Komisionit për Energjinë dhe Tregtinë të Dhomës së Përfaqësuesve të ShBA-së dhe qëndrimi i tij tashmë dihet, raporton Klix, përcjell Fol Drejt.
Chew do të merret në pyetje për pretendimet se Partia Komuniste Kineze po manipulon aplikacionin, pasi Shtëpia e Bardhë kërkoi që TikTok të ndërpresë lidhjet me pronarët e tij kinezë ose të përballet me një ndalim.
Megjithatë, Chew do të japë një përgjigje të qartë të enjten.
“TikTok kurrë nuk ka ndarë apo marrë një kërkesë për të ndarë të dhënat e përdoruesve të ShBA me qeverinë kineze. TikTok nuk do të përmbushte një kërkesë të tillë nëse do ta merrte ndonjëherë një të tillë,” do të jetë përgjigja e Chew, të paktën sipas dëshmisë me shkrim të paraqitur të martën.
Chew shtoi se ByteDance, kompania mëmë e TikTok, nuk është në pronësi apo kontrolluar nga qeveria kineze apo ndonjë organ tjetër qeveritar.
“Më lejoni ta them këtë pa mëdyshje. ByteDance nuk është agjent i Kinës apo i ndonjë vendi tjetër,” do të thotë CEO i TikTok.
Megjithatë, kritikët e TikTok pretendojnë se aplikacioni përbën një rrezik për privatësinë e amerikanëve, si dhe një rrezik për sigurinë kombëtare të ShBA. TikTok ka njoftuar se më shumë se 1.5 miliardë dollarë janë shpenzuar për një iniciativë që synon mbrojtjen e të dhënave të përdoruesve amerikanë të njohur si “Project Texas”.
Pekini ka akuzuar Uashingtonin për “përhapjen e dezinformimit” dhe “ushtrimin e presionit” mbi aplikacionin.
Chew pretendon se në ShBA, më shumë se 150 milionë njerëz përdorin TikTok çdo muaj, ndërsa në vitin 2020 ky numër ishte 100 milionë.
“Pothuajse gjysma e ShBA-së përdor TikTok për të krijuar dhe ndarë përmbajtje, për të mësuar ose për t’u argëtuar”, shtoi drejtori.
Ai u tha përdoruesve të aplikacionit që t’i tregonin atij në komente se çfarë u pëlqen në TikTok, në mënyrë që qeveria e tyre ta dijë.
“Disa politikanë kanë filluar të flasin për ndalimin e TikTok. Kjo mund t’ju heqë të gjithë 150 milionë përdoruesit nga TikTok,” përfundoi Chew. /FolDrejt/
