Opozitari më i zëshëm në parlamentin e Serbisë Radomir Lazoviq e ka lavdëruar iniciativën e Miroslav Lajçakut për ta dëgjuar edhe zërin opozitar serb, pasi ka thënë se Aleksandër Vuçiq nuk është i interesuar ta mbrojë interesin e Serbisë, por të bëjë gjithçka që ia siguron edhe më tej jetëgjatësinë në pushtet, transmeton Fol Drejt.
“Është për t’u lavdëruar që Miroslav Lajçak ka vendosur të dëgjojë se çfarë mendon opozita në Serbi, dhe ne përndryshe do të insistojmë në një përfshirje më të madhe të saj në të gjitha proceset e negociatave në mënyrë që të dimë se çfarë është hedhur në tryezë, pasi besojmë se Vuçiq nuk negocion për të mbrojtur interesat e Serbisë, por interesat e tij për të qëndruar në pushtet” – citohet të ketë thënë Radomir Lazoviq.
“Ne besojmë se marrëveshja evropiane mund të jetë hapi i parë drejt pajtimit të dy popujve nëse realisht do të krijohej një bashkësi e komunave serbe në zbatim, por nga ana tjetër do të paralajmërojmë Vladimir Lajçakun se në Serbi ka një regjim hibrid në pushtet që çdo ditë e më shumë po e largon shoqërinë tonë nga demokracia”- thotë Radomir Lazoviq, pak orë para takimit me Lajçakun.
Po ashtu ai citohet të ketë thënë se “ne besojmë se Serbia duhet të harmonizojë politikën e saj të jashtme me BE-në, por ajo që është më e rëndësishme për ne është mungesa e plotë e sundimit të ligjit, keqpërdorimi i mediave dhe shtypja e parlamentit në Serbi”.
Ai a thënë se për të gjitha këto do ta paralajmërojë Lajçakun:
“Ne nuk jemi dakord të heqim dorë nga standardet demokratike në Serbi”, përfundon ai.
Miroslav Lajçak, pas dy ditësh qëndrimi në Prishtinë, sot ndodhet në Beograd. Ai rreth orës 15 do të takohet me presidentin e Serbisë, Aleksandar Vuçiq, rreth orës 16:00 me përfaqësues të opozitës.
Kujtojmë se më 18 mars në Ohër do të takohen sërish Kryeministri i Kosovës Albin Kurti dhe presidenti i Serbisë Aleksandër Vuçiq, me qëllim që të angazhohen më fort për përmbushjen e kritereve nga marrëveshja e paqes evropiane./FolDrejt/
