Ferid Murat ndërroi jetë në moshën 87 vjeçare. Nobelistin amerikan me origjinë shqiptare nuk e kujtoi gati askush nga figurat publike në Kosovë e Shqipëri, shkruan Fol Drejt.
Në vitin 1999 ai pat vizituar Shqipërinë, për ta festuar çlirimin e Kosovës. Gazetari Blendi Fevziu duket që i ka ende të freskëta kujtimet për të. “Ishte tejet krenar për origjinën e tij” – ka shkruar Fevziu në një postim të publikuar në llogarinë e tij në Facebook.
Sipas të dhënave gjenealogjike, Murat ishte i biri i Henrietta Josephine Bowman nga Alton, Illinois dhe Xhabir Murat Ejupi, një emigranti shqiptar me origjinë nga Gostivari i Maqedonisë Veriore. Ai u bë i njohur për përkushtimin e tij si shkencëtar në fushën e mjekësisë, ndërsa më 1998, së bashku me dy kolegë të tij, u laureua me Çmimin Nobel për Mjekësi.
Ky është statusi i plotë (pa ndërhyrje), i Fevziut:
Ferid Murati nderroi jete dje ne SHBA. Ishte 87 vjec. Ai eshte nje nga dy fituesit e cmimit Nobel me origjine shqiptare. Ashtu si edhe Nene Tereza ai vinte nga shqiptaret e Maqedonise. Babai i tij kishte lindur ne Gostivar, por u transferua heret ne SHBA, ku nga martesa me nje vajze amerikane pati 3 djem. Feridi ishte me i madhi. Karriera e tij nisi si nje mjek i thjeshte, por ai u be nder kerkuesit dhe shkencetaret me te njohur te SHBA. Me 1998 mori bashke me dy kolege te tjere cmimin Nobel per Mjekesi. Ai luajti nje rol te rendesishem ne shpikjen e Viagres dhe u nderua pikerisht per kete.
E takova ne Tetor 1999 gjate nje vizite ne Shqiperi. S’kishte ardhur kurre ne vendin e te pareve te tij. Ne fakt thuajse s’kishte jetuar ne nje mjedis shqiptar, por ishte tejet krenar per origjinen e tij. Ishte bashke me nje grup shqiptaro – amerikanesh, qe kishin mberritur gjithe triumf per te festuar Lirine e Kosoves ate vere. Bashke me te ishte edhe Anthoni Athanas.
E shijoi si nje femije atdheun e panjohur. Dilte rrugeve, fliste me njerez, dha nje leksion ne fakultetin e Mjekesise dhe premtoi se do kthehej serish. Me sa kujtoj nuk u kthye me, por ate dite ndersa po ikte kishte gezimin e nje adoleshenti. Me ate perskuqjen parakteristike ne faqe dhe me shprehejn tipike amerikane per cdo pyetje tonen shqetesuese: All right!
U prehsh ne Paqe Ferid Murad. Faleminderit qe ishe krenar per origjinen tende shqiptare dhe s’e fshehe kurre.
/FolDrejt/
