Dy fëmijë u vranë dhe gjashtë të tjerë u plagosën kur një autobus u përplas në një çerdhe në Quebec, thotë policia kanadeze, raporton BBC, përcjell Fol Drejt.
Shoferi 51-vjeçar i autobusit, i cili ishte punonjës i sistemit të transportit publik lokal, është arrestuar dhe akuzuar për vrasje dhe drejtim të pakujdesshëm.
Policia i tha BBC-së se fillimisht u lajmërua për aksidentin rreth orës 08:30 me orën lokale (13:00 GMT) të mërkurën.
Rrethanat e sakta të ngjarjes, e cila ndodhi në periferi të Montrealit, Laval, janë të paqarta.
“Ne mendojmë se është e qëllimshme, por nuk e dimë motivin,” tha Pierre Brochet, shefi i policisë në Laval.
Një dëshmitar okular, Hamdi Ben Chaabane, tha se shoferi doli nga autobusi pas përplasjes, hoqi rrobat e tij dhe filloi të vepronte në mënyrë të çrregullt.
Disa fëmijë u kapën nën rrotat e automjetit, tha ai. “Ishte një makth. Është e tmerrshme. Ai nuk pushoi së bërtituri. Nuk po thoshte fjalë.”
Çerdhja ndodhet në një rrugë të qetë në Laval dhe policia e rrethoi zonën të mërkurën pasdite.
Një qendër krizash është ngritur aty pranë për të ndihmuar prindërit dhe familjet, tha policia.
Kryeministri i Quebec François Legault tha për mediat lokale: “Të gjitha mendimet e mia janë me fëmijët, me prindërit dhe me punonjësit”.
Kryeministri Justin Trudeau, i cili është nga Montreali, tha se mendimet e tij ishin “me familjet në Laval që po jetojnë momente tepër të vështira. Shpresojmë që të gjithë të jenë mirë”. /FolDrejt/
