Trupat e dy të rinjve janë gjetur në karrocën e një avioni Avianca gjatë procedurave të kontrollit në kryeqytetin kolumbian Bogota, sipas linjës ajrore dhe zyrës së prokurorit të përgjithshëm të Kolumbisë, shkruan Al Jazeera, përcjell Fol Drejt.
Trupat u zbuluan nga personeli i linjës ajrore pasi avioni nga Santiago, Kili, u ul në Bogota të premten në mbrëmje.
“Pas mbërritjes së tij në aeroportin El Dorado në Bogota, personeli nga linja ajrore zbuloi trupat e dy personave që fluturuan në mënyrë të parregullt [të arratisur] në pjesën e poshtme të avionit”, tha Avianca në një deklaratë të shtunën.
Avianca shprehu ngushëllimet për familjet e dy personave dhe shtoi se megjithëse inspekton aeroplanët para çdo fluturimi, siguria e aeroporteve dhe zonave të tyre të kufizuara është përgjegjësi e autoriteteve.
“Organi i hetimit teknik i zyrës së prokurorit të përgjithshëm po kryen veprime urgjente për të identifikuar kombësinë dhe origjinën e trupave të moshës 15 deri në 20 vjeç, afrikanë, të cilët u gjetën brenda aeroplanit”, tha zyra e Prokurorit të Përgjithshëm në një deklaratë.
Megjithëse nuk u gjetën dokumente identifikimi tek kufomat, njëri mbante valutë nga Republika Domenikane dhe një valixhe e gjetur tek ta kishte dokumente nga ai vend, duke sugjeruar se ata mund të kenë qenë në atë vend.
Këto zbulime “rezultojnë se ata mund të kishin qenë në aeroplan që nga 3 janari”, kur ishte për herë të fundit në Republikën Domenikane, tha zyra.
Avionit iu bë kontrolla e rregullt më 27 dhjetor, shtoi zyra e prokurorit të përgjithshëm, dhe që atëherë ka udhëtuar në Bogota, Guarulhos, pranë Sao Paulo, Brazil dhe Santiago.
Trupat ishin ngrirë dhe ishin shkrirë pjesërisht, thuhet në deklaratë, dhe njëri kishte djegie. /FolDrejt/
