Inspektorati Policor i Kosovës (IPK) njofton se është arrestuar dhe suspenduar nga puna një zyrtar policor, nën dyshimin se i njëjti është përfshirë në një aksident në Novosellë të Pejës, pasi ishte duke vozitur në gjendje të dehur.
Në njoftim thuhet se hetuesit e IPK-së, të martën mbrëma kanë pranuar informacion nga Policia e Kosovës lidhur me një aksident trafiku më lëndime trupore në mes dy automjeteve civile, ku ishte përfshirë edhe një zyrtar policor (jashtë detyrës zyrtare me veturë private), raporton “Betimi për Drejtësi”.
IPK njofton se hetuesit e tyre me të pranuar informacionin, kanë filluar të ndërmarrin veprimet fillestare hetimore në koordinim me prokurorin kujdestar.
“Sipas hetimeve fillestare, aksidenti është raportuar të ketë ndodhur dje në fshatin Novosellë të Pejës (në afërsi të terminalit doganor). Pas veprimeve hetimore dhe pas alkool testit me dyshimin se ka kryer veprën penale “Ngasja në gjendje të paaftë apo të dehur” nga IPK është arrestuar i dyshuari (zyrtari policor) ndaj të cilit prokurori ka lëshuar aktvendim për ndalim për 48 orë. Si pjesë e procedurës administrative hetimore zyrtari policor është suspenduar nga puna”, thuhet në njoftim.
Bëhet e ditur se veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente. /BetimipërDrejtësi
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
