“Ne nuk ndihemi as të lirë dhe as të sigurt”, shkruan Sava Janjiq, igumen i manastirit të Deçanit, në një tekst autorial për Tagespiegelin gjerman. Ai fajëson autoritetet në Prishtinë për inkurajimin e një Kosove “etnikisht të pastër”, shkruan mediat beogradase, transmeton Fol Drejt.
Janjiq shkruan për gazetën e Berlinit Tagespiegel se marrëdhëniet ndërmjet shqiptarëve dhe serbëve në Kosovë janë më të tensionuara që nga trazirat e vitit 2004 dhe se ka raportime të vazhdueshme për presionin që serbët vuajnë nga policia e Kosovës.
“Me ndihmën e saj duket se serbët duhet të detyrohen të dorëzohen, ndërkohë që në të njëjtën kohë nuk merren parasysh kërkesat e SHBA-së dhe BE-së për deeskalim – veçanërisht kërkesa për tërheqjen e policisë dhe kryetarëve shqiptarë nga veriu i vendit”, citohet të ketë thënë ai.
Janjiq vlerëson se pozita e serbëve u përkeqësua edhe më shumë me ardhjen e Albin Kurtit dhe Qeverisë së tij. “Kjo qeveri duket se dëshiron t’i nënshtrojë serbët e Kosovës përmes okupimit de fakto. Më kujtohet koha kur mund të bashkëpunonim hapur me institucionet e Kosovës. Por vitet e fundit janë intensifikuar fjalimet nxitëse, agresiviteti i mediave dhe lajmet e rreme kundër serbëve dhe Kishës sonë”.
“Mund të falënderojmë vetëm praninë e KFOR-it dhe përfaqësuesve ndërkombëtarë për minimumin e të drejtave dhe sigurisë për momentin. Në të njëjtën kohë, përshkallëzimi i nacionalizmit mbarëshqiptar, i cili po ushqehet nga qeveria aktuale në Prishtinë, shkon paralelisht me represionin dhe mosrespektimin e marrëveshjes, duke minuar besimin në institucionet e Kosovës që ishte ndërtuar më viteve më herët”, thuhet në artikullin e Tagespiegel.
Janjiq shkruan se në Prishtinë ekziston dëshira për një “Kosovë etnikisht të pastër” dhe shton se të rinjtë serbë të Kosovës “që nuk duan të jetojnë si qytetarë të dorës së dytë” po radikalizohen.
“Në thelb, nacionalistët e të gjitha ngjyrave janë të bashkuar nga një vizion monstruoz i shoqërive etnikisht homogjene. Mungesa e gatishmërisë së BE-së për të integruar vendet e Ballkanit Perëndimor i hapi rrugën forcimit të nacionalizmit, krimit të organizuar dhe korrupsionit”, shton igumeni i Deçanit.
“Serbët e Kosovës duan të jetojnë të sigurt dhe në paqe. Është e vështirë të imagjinohet tani sepse autoritetet e Kosovës duan të detyrojnë besnikërinë nga policia. Ky ishte pikërisht gabimi i madh i Millosheviqit në vitet nëntëdhjetë. Kryeministri Kurti duket se po përsërit të njëjtën qasje”, shkruan Janjiq.
Lidhur me dialogun ndërmjet Beogradit dhe Prishtinës, i cili vazhdon këtë të enjte (14 shtator) në Bruksel, Janjiq thekson se fillimisht duhet të zbatohen të gjitha marrëveshjet e arritura mes viteve 2013 dhe 2022, ku përfshihet edhe Bashkimi i Komunave Serbe. Dhe vetëm atëherë kalohet në marrëveshjet e këtij viti nga Brukseli dhe Ohri, të cilat Janjić i konsideron “të padyshimtë vetëm joformalisht të dakorduara”.
“Ne nuk mund ta ngremë çatinë e shtëpisë para themelit dhe mureve. Shtyllat e çdo shoqërie stabile përfshijnë sundimin e ligjit, respektimin e të drejtave të pakicave dhe respektimin rigoroz të standardeve ndërkombëtare të BE-së, të cilat aktualisht nuk ekzistojnë në Kosovë”, shton Janjiq duke përfunduar, se:
“Çështja vendimtare është nëse Kosova me të vërtetë dëshiron të jetë një shoqëri e vërtetë evropiane ku të gjithë mund të jetojnë të lirë pa dallim etnie dhe feje – apo një shoqëri etnike-shqiptare ku nuk ka vend për të tjerët”./FolDrejt/
