Është bërë e ditur se Dogana e Kosovës ka marr vendim për largimin e disa zyrtarëve nga puna.
Bëhet fjalë për 9 zyrtarë doganorë, ndaj të cilëve janë duke u zhvilluar procese gjyqësore penale, transmeton Fol Drejt.
Në njoftim zyrtar thuhet se bazuar në hetimet e brendshme dhe procedurën e zhvilluar disiplinore, zyrtarët në fjalë fillimisht janë suspenduar, ndërsa pas zhvillimit të një procesi disiplinor dhe bazuar në provat e administruara është vendosur për shkëputje përfundimtare të marrëdhënies së punës.
“Provat e administruara janë të qarta për të dëshmuar se veprimet dhe mosveprimet e zyrtarëve në këtë rast janë të dënueshme dhe paraqesin shkelje të rëndë të Kodit të Mirësjelljes.
Dogana e Kosovës është e përkushtuar në shërbim të interesit publik dhe të gjithë zyrtarët doganor duhet me përgjegjësinë më të lartë të përmbushin detyrat dhe misionin e Doganës së Kosovës, që i shërben mbrojtjes së qytetarëve dhe ekonomisë së Kosovës”, thuhet në njoftim.
Nga Dogana e Kosovës besojnë se brenda stafit të saj ka integritet moral e profesional. Brenda saj po ashtu ka gatishmëri për luftimin edhe të dukurive negative siç është korrupsioni.
Dogana e Kosovës ka lansuar aplikacionin për pajisje të mençura e quajtur eDogana, zgjidhje kjo e cila paraqet një platformë të sigurt dhe të avancuar të komunikimit. Dogana e Kosovës mirëpret bashkëpunimin me publikun për të mundësuar mbrojtjen e qytetarëve dhe mbrojtjen e interesave financiare të Republikës së Kosovës. /FolDrejt/
