Elvis Hoxha – këshilltar politik i kryeministrit Albin Kurti – i ka kërkuar falje kryetarit të Sindikatës së Bashkuar të Arsimit, Shkencës dhe Kulturës, Rrahman Jasharajt, pasi që e quajti anëtar të partisë serbe.
Kjo vjen pas një shkrimi që Hoxha, i cili jeton në Tiranë, postoi në llogarinë e tij në Facebook ku tha se nuk është aspak e çuditshme që Rahman Jasharaj përdor grevën e mësuesve pikërisht kur duhet të forcohet sovranitetit në veri të Kosovës.
“Ajo që është e dhimbshme, është pjesëmarrja e mësuesve në këtë grevë që ka për shef anëtarin e partisë serbe”, ka shkruar Hoxha.
Madje, ai vazhdoi tutje me një postim tjetër në Facebook duke thënë se shpreson që ‘kosovaristët’ nuk do të kërkojnë që ta shpallin atë person non grata në Kosovë.
Këto shkrime të këshilltarit politik të Kurtit ngjallën reagime të shumta në Kosovë. Pati edhe të tillë që e kërcënuan atë.
Blerim Syla nga Federata e Sindikatave të Shëndetësisë i ka bërë thirrje kryeministrit Albin Kurti që të ndërmarrë masa ndaj Elvis Hoxhës, përndryshe tha se nuk do të garantojë për veprimet e tij.
“Prej këtij momenti nëse kryeministri Albin Kurti nuk ndërmerr masa ndaj këtij krimineli, i cili paguhet nga taksat tona, unë nuk garantoj në veprimet e mia e shteti le të veprojë. Nëse ju nuk distancoheni nga këta maniako-depresiva, ta dini se Kosova ka ende burra”.
Reagoi edhe zëdhënësja e Lidhjes Demokratike të Kosovës, Sibel Halimi, e cila tha se Kosova nuk ka nevojë për ideologë të urrejtjes dhe përçarjes.
“Kosova nuk ka nevojë për ideologë të urrejtjes dhe përçarjes, por të ideve progresive, debatit konstruktiv e dialogut shoqëror për tejkalimin e krizave. E papranueshme qasja diskriminuese dhe stigmatizuese e zyrtarëve të lartë të partisë në pushtet karshi të gjithë atyre që nuk pajtohen me diktatin dhe vullnetin e saj për sundim absolut. Republika e Kosovës u lind nga shpirti i rezistencës demokratike ndaj mentalitetit autoritar. Dhe ky vend nuk e toleron frymën e fanatizmit dhe kulturën e damkosjes së tjetrit të ndryshëm”.
Pas nëntë orësh nga postimi i parë, Hoxha i kërkoi falje Jasharajt, duke thënë se u është referuar disa lajmeve që kanë qenë të pakonfirmuara dhe se ka bërë cilësim të padrejtë.
“Nuk kam turp të kërkoj falje, sidomos nëse i kam rënë në qafë Rrahman Jasharajt duke u bazuar në një lajm të gabuar që u shpërnda nëpër media lidhur me personin dhe të shkuarën e tij. Nuk e di si qëndron e vërteta lidhur me këtë lajm. Siç duket informacioni, edhe pse i shpërndarë nëpër disa media, paska qenë i pakonfirmuar. Kështu që i kërkoj falje, jo thjesht, por falje me ndjenjë të lartë përgjegjësie”.
“Së dyti, i kërkoj falje vetëm për informacionin e paqëndrueshëm në lidhje me të shkuarën e tij. E dëgjova shprehjen e tij publike. E përsëris se nuk kam turp të kërkoj falje kur kam bërë një cilësim të padrejtë”.
Kujtojmë se kryetari i SBAShK-ut, Rrahman Jasharaj, ka thirrur grevë nga data 25 gusht – e cila e pamundësoi fillimin e vitit të ri shkollor më 1 shtator – me kërkesën për 100 euro shtesë në pagat e mësimdhënësve deri në miratimin e Ligjit për Paga.
Më poshtë mund ta lexoni shkrimin e plotë të Elvis Hoxhës:
Nuk kam turp të kërkoj falje, sidomos nëse i kam rënë në qafë z. Rrahman Jasharaj duke u bazuar në një lajm të gabuar që u shpërnda nëpër media lidhur me personin dhe të shkuarën e tij. Nuk e di si qëndron e vërteta lidhur me këtë lajm. Siç duket informacioni, edhe pse i shpërndarë nëpër disa media, paska qenë i pakonfirmuar. Kështu që i kërkoj falje, jo thjesht, por falje me ndjenjë të lartë përgjegjësie.
Pak më intereson se si më ka kualifikuar z. Jasharaj në një shprehje të tij publike.
Së dyti, i kërkoj falje vetëm për informacionin e paqëndrueshëm në lidhje me të shkuarën e tij. E dëgjova shprehjen e tij publike. E përsëris se nuk kam turp të kërkoj falje kur kam bërë një cilësim të padrejtë.
Por i lutem zotit Jasharaj, të mos e marrë fare këtë falje si gjithëpërfshirëse. Në kohën kur po zhvillohet një punë intensive për rivlerësimin e pagesës së mësuesit, të këmbëngulësh në grevë dhe në ndërprerje të procesit pa nisur ende shkolla, kjo më duket e papranueshme.
Unë jam mbështetës i sindikalizmit. Megjithatë, buxhetet dhe direktivat e tjera të sovranitetit janë një organizim i tërë. Arsimi është shtylla e Republikës. E njoh shumë mirë edhe arsimin paralel në kohën e pushtimit. Është një nga vlerat më shembullore në Evropë. Ndaj dhe më duket shumë mekanike dhe e keqorientuar greva aktuale. Nderi i mësuesit nuk shprehet vetëm te paga. Dinjiteti dhe autoriteti i mësimdhënësit është shumë kompleks. Ai qëndron tek aftësia komunitare dhe cilësia publike e arsimit, te garancitë e ardhmërisë së kombit dhe shoqërisë.
Nuk më interesojnë kërcënimet fizike që më janë dërguar dhe më dërgohen në messenger dhe në komente.
Edhe një herë, ky postim qëndron vetëm në një kërkim falje drejtuar vetëm z. Jasharaj në lidhje me një informacion të paqëndrueshëm./KlanKosova/
