Një burrë 71 vjeç në Illinois është akuzuar për therjen fatale të një djali 6-vjeçar dhe për plagosjen e një gruaje 32-vjeçare. Ky krim i urrejtjes ndodhi të dielën.
Policia amerikane tha se viktimat u shënjestruan për shkak se ishin myslimanë dhe se sulmi me thikë ndodhi për shkak të luftës mes Izraelit dhe grupit palestinez të Hamasit.
Në ditët e fundit, policia në qytetet amerikane dhe autoritetet federale kanë qenë në gatishmëri të lartë për shkak të dhunës që mund të nxitet nga sentimenti islamofobik. Byroja Federale e Hetimit (FBI), së bashku me grupet hebreje dhe myslimane kanë raportuar për rritje të kërcënimeve dhe retorikës së urrejtjes.
Në zonën e Çikagos, zyrtarët gjetën gruan dhe djalin e vrarë në shtëpinë e tyre afër 65 kilometra në jugperëndim të Çikagos.
Gruaja 32-vjeçare ka pësuar disa lëndime me thikë dhe pritet t’u mbijetojë plagëve, thanë autoritetet. Ndërkaq, 6-vjeçari i vrarë, sipas autopsisë, ishte therur disa herë me thikë.
“Detektivët ishin në gjendje të vinin në përfundim se dy viktimat e këtij sulmi brutal u shënjestruan nga i dyshuari sepse ishin myslimanë dhe për shkak të konfliktit mes Izraelit dhe Hamasit”, u tha në deklaratën e policisë.
Sipas autoriteteve, gruaja e plagosur kishte thirrur policinë dhe kishte raportuar se qiradhënësi i saj e kishte sulmuar atë me thikë.
I dyshuari është arrestuar në shtëpinë e tij dhe kishte plagë në fytyrë, thanë autoritetet. Ai është identifikuar si Joseph M. Czuba dhe është akuzuar për vrasje dhe tentim vrasje.
Organizata joqeveritare për të drejtat civile të myslimanëve e quajti këtë krim si “akthin tonë më të tmerrshëm” dhe nga kjo organizatë thanë se kanë pranuar kërcënime në rritje që kur ka shpërthyer konflikti midis Izraelit dhe Hamasit.
Presidenti amerikan, Joe Biden, ka reaguar për këtë ngjarje duke thënë se “ky akt i tmerrshëm i urrejtjes nuk ka vend në Amerikë”.
