Një funeral në Peru është ndërprerë në mënyrë dramatike pasi u dëgjuan trokitje brenda një arkivoli.
Familja e Rosa Isabel Cespedes Callaca ishte mbledhur në qytetin e Lambayeque për të bërë nderimet e fundit më 26 prill.
Rosa ishte përfshirë në një aksident të rëndë në rrugën Chiclayo-Picsi të rajonit. Aksidenti i mori jetën kunatit të saj dhe plagosi rëndë nipat e saj.
Ajo ishte shpallur ‘e vdekur’ pas përplasjes së tmerrshme dhe më vonë e futën në një arkivol përpara funeralit të saj. Por kur të afërmit e saj ngritën arkivolin mbi supet e tyre, ata filluan të dëgjonin tinguj të çuditshëm.
Ata ulën arkivolin dhe hapën kapakun për të gjetur një ‘grua të dobët’, por të gjallë, që po i vështronte.
Kujdestari i varrezave Juan Segundo Cajo tha: “Ajo hapi sytë dhe ishte duke u djersitur. Shkova menjëherë në zyrën time dhe thirra policinë”.
Të afërmit e tronditur dërguan Rozën, ende në arkivolin e saj, në Spitalin Referencial Ferrenafe në Lambayeque. Rosa u zbulua se kishte shenja të dobëta të jetës dhe u lidh me një makineri për mbështetjen e jetës nga mjekët. Por gjendja e saj u përkeqësua dhe ajo vdiq tragjikisht vetëm disa orë më vonë.
Familja e saj, të cilës iu desh të jepnin lamtumirën dy herë, tani po kërkon përgjigje.
Ata janë shprehur të indinjuar ndaj shefave të kujdesit shëndetësor për faktin se ajo u shpall e vdekur ‘në radhë të parë’, transmeton Klankosova.tv.
