Ndërsa numri i aksidenteve në trafik, duke i përfshirë edhe ato fatale, mbetet ende i lartë, Policia e Kosovës, përkatësisht njësitë e trafikut, po përpiqen që t’i sensibilizojnë e ndërgjegjësojnë qytetarët për rrezikun që u vjen nga vozitjet me shpejtësi të lartë, përtej normave të lejuara , shkruan Fol Drejt.
Pikërisht sot PK njoftoi për një rast ekstrem, ku një shofer ishte gjobitur për shkak se voziti automjetin e tij me shpejtësi 106 km/h në një rrugë ku kufizimi i shpejtësisë është përcaktuar 40km/h.
“Gjobë dhe masa mbrojtëse ndaj kundërvajtësit i cili në zonën ku kufizimi i shpejtësisë është 40km/h, drejton automjetin me shpejtësi prej 106 km/h
Njësia Rajonale e Trafikut në kuadër të Drejtorisë Rajonale të Policisë në Mitrovicën e Jugut, sot gjatë kontrollit të trafikut rrugor në rrugën nacionale Mitrovicë-Prishtinë përkatësisht në segmentin rrugor në Vushtrri, gjatë matjes së shpejtësisë me radar ka identifikuar një veturë e cila ishte duke zhvilluar shpejtësi prej 106 km/h në zonën urbane ku kufizimi i shpejtësisë është 40 km/h.
Ndaj kundërvajtësit është shqiptuar gjoba prej 500 euro, pesë (5) pikë negative si dhe masa mbrojtëse-ndalim i drejtimit të mjetit me veprim motorik për një (1) vit.
Masat ndëshkimore të parapara me ligj, do të vazhdojnë të merren ndaj te gjithë kundërvajtësve të cilët nuk respektojnë rregullat në trafik dhe rrezikojnë sigurinë e pjesëmarrësve në trafikun rrugor” – thuhet në njoftimin zyrtar./FolDrejt/
