Kriza e arsimit po vijon. Greva e sindikalistëve të arsimit, përkatësisht, refuzimi i Ministrisë së Arsimit dhe Qeverisë së Kosovës për t’ua përmbushur kërkesat, ka bërë që edhe ky fillim jave të mos dëgjohet zhurma e nxënësve në oborret dhe ambientet e shkollave, shkruan Fol Drejt.
Ministrja e Arsimit Arbërie Nagavci gjatë fundjavës edhe një herë ftoi mësimdhënësit dhe nxënësit që t’u kthehen shkollave, mirëpo ata duken të vendosur, për t’i përfillur këshillat e Sindikatës së Bashkuar të Arsimit, Shkencës dhe Kulturës (SBAShK).
Sipas këtyre të fundit, përderisa Qeveria e Kosovës nuk reflekton, greva do të mbetet opsioni i tyre i vetëm, drejt përmbushjes së kërkesave të punëtorëve arsimor.
“ Edhe njëherë Arberie Nagavci tregoj qe nuk është e interesuar ta ndalë grevën dhe të filloj mësimin, por prezanton drafte për publikun duke tentuar qe ta manipuloj atë.
Ky nuk është drafti për të cilin kemi diskutuar me Avokatin e Popullit dhe si i tillë nuk ka mundur të publikohet pa dakordimin e palëve.
Ne si kemi nxjerrë as muhabetet me kryeministrin dhe as me avokatin e popullit, sepse kemi respektu mikpritësin dhe kemi shpresu në marrëveshje. Se fëmijët pa të drejtë afektohen nga greva dhe qeverisë nuk i bëjnë përshtypje humbjet” – shkroi ndër të tjera Ali Sefaj, anëtar i këshillit grevist.
Qëndrimet, ndërkaq, duken të largëta, përkundër thirrjeve të vazhdueshme edhe palëve të tjera, që ngërçi të tejkalohet.
Avokati i Popullit në një reagim ua kujtoi palëve që çdo qëndrim i tyre, do të duhej ta kishte në qendër të vëmendjes interesin kombëtar, përkatësisht fëmijët. E ardhmja e tyre varet, pikërisht, nga vendimet që do të merren sot për ta:
“Parimi i interesit më të mirë për fëmijët duhet ta udhëheqë secilin prej nesh në kuadër të përmbushjes së detyrimeve dhe të përgjegjësive që kemi. Çdo orë e humbur e mësimit ka pasoja të pandreqshme për fëmijët dhe vazhdimi në mospjesëmarrje në mësim është i dëmshëm në shumë aspekte”, ka deklaruar Avokati i Popullit.
Nuk dihet nëse gjatë kësaj jave do të zhvillohen takime të tjera, në përpjekje për ta zgjidhur situatën, ndërsa raportet duket se janë përkeqësuar që nga takimi i fundit./FolDrejt/
