Ministrja spanjolle e Mbrojtjes këmbënguli se Spanja “asnjëherë nuk e ka menduar” dërgimin e trupave në Ukrainë në mes të tensioneve në rritje me Rusinë. Megjithëse Spanja kohët e fundit ka dërguar anije luftarake në misionet e NATO-s në Detin e Zi dhe ka ofruar të dërgojë avionë luftarakë në Bullgari, Margarita Robles për transmetuesin spanjoll Onda Cero tha se vendi nuk ka plane që ushtarët spanjollë të luftojnë në tokën ukrainase.
“Neni 5 i NATO-s thotë se kur ka një agresion ndaj një vendi aleat, të gjithë të tjerët duhet të përgjigjen. Por Ukraina nuk i përket aleancës”, tha ajo, duke përsëritur atë që sekretari i NATO-s, Jens Stoltenberg, deklaroi për BBC-në të dielën, shkruan AA, transmeton Fol Drejt.
Robles theksoi se Spanja është e përfshirë vetëm në misionet e përhershme të NATO-s që janë “josulmuese” dhe “të fokusuara në parandalimin dhe ruajtjen e paqes”.
Spanja ka qenë pjesë e NATO-s për 40 vjet, ndërsa samiti i ardhshëm i organizatës do të zhvillohet në Madrid në qershor.
Ndër të tjera, ajo theksoi se “Rusia nuk ka të drejtë t’i thotë Ukrainës se çfarë të bëjë”, duke përmendur se 34 luftëra që janë duke vazhduar në mbarë botën dhe duke thënë se ka situata të ngjashme komplekse në vende të tilla si Mali.
“Kur bëhet fjalë për diskurse të përgjithshme si ‘thoni jo luftës’, natyrisht të gjithë jemi dakord, por më vonë ju duhet të përballeni me realitetin e ashpër të luftës dhe ajo që duhet të bëni është të punoni për paqen”, shtoi ajo.
Lëvizjet e fundit të Spanjës për të përshpejtuar dislokimet në misionet e NATO-s rreth Ukrainës kanë shkaktuar tensione në qeverinë e koalicionit progresiv të vendit.
Anëtarët e partnerit të vogël të koalicionit Unidas Podemos kanë kritikuar publikisht pjesëmarrjen e përshpejtuar të Spanjës në misionet e NATO-s dhe rritjen e armiqësisë kundër Rusisë.
Partia e ekstremit të majtë ka ringjallur të njëjtin slogan kundër luftës që përdorej kur Spanja u bë një nga pak vendet që dërguan trupa për të mbështetur pushtimin e Irakut të udhëhequr nga SHBA-ja.
Rusia në vitin 2014 aneksoi Gadishullin e Krimesë të Ukrainës dhe së fundmi grumbulloi dhjetëra mijëra trupa pranë kufirit lindor të Ukrainës, duke shkaktuar frikën se mund të planifikojë një tjetër ofensivë ushtarake kundër fqinjit të saj ish-sovjetik.
Moska ka mohuar se po përgatitet për pushtim, duke pretenduar se trupat e saj janë atje për stërvitje. Ajo gjithashtu ka dalë me një listë të kërkesave të sigurisë, duke përfshirë mosanëtarësimin e Ukrainës në NATO.
Në një përgjigje me shkrim ndaj këtyre kërkesave, Washington-i ka thënë se është i përkushtuar të mbështesë “politikën e dyerve të hapura” të NATO-s. NATO gjithashtu përcolli përgjigjen e vetë aleancës “paralelisht me Shtetet e Bashkuara”.
