Eksportet gjermane ranë papritur në nëntor pasi inflacioni i lartë dhe pasiguria e tregut vazhdojnë të rëndojnë ekonominë më të madhe të Evropës, pavarësisht nga zbehja e problemeve të zinxhirit të furnizimit, shkruan Reuters, përcjell Fol Drejt.
Eksportet ranë me 0.3% në muaj, treguan të enjten të dhënat nga zyra federale e statistikave. Analistët e anketuar nga Reuters parashikuan rritje prej 0.2%.
Rënia e nëntorit vjen pasi shifrat e tetorit u rishikuan, me një rritje prej 0.8% nga një rënie e raportuar fillimisht prej 0.6%.
Importet gjithashtu shënuan një rënie më të madhe se sa pritej prej 3.3% në nëntor, krahasuar me konsensusin për një rënie prej 0.5%.
Dërgesat në partnerin kryesor të eksportit të Gjermanisë, Shtetet e Bashkuara, ranë 1.5% në muajin nëntor, ndërsa eksportet në vendet anëtare të Bashkimit Evropian ranë me 0.4%.
“Ndërsa Kina dhe Shtetet e Bashkuara po dobësohen, momenti i eksportit do të mbetet i ndrydhur për momentin,” tha kryeekonomisti i bankës private Hauck Aufhaeuser Lampe, Alexander Krueger.
Krueger shtoi se zvogëlimi i pengesave materiale dhanë disa arsye për optimizëm. “Sektori i eksportit mbështet perspektivën e një recesioni të butë,” shtoi ai.
Një sondazh i publikuar të hënën tregoi se rënia në sektorin e prodhimit të Gjermanisë ishte lehtësuar disi në dhjetor për shkak të disponueshmërisë së përmirësuar të materialeve, megjithëse kërkesa më e dobët vazhdon të prekë prodhuesit.
Instituti Ekonomik Ifo zbuloi se numri i kompanive të sektorit të prodhimit që raportuan probleme me mungesën e materialeve ra për të tretin muaj radhazi në dhjetor. /FolDrejt/
