Policia në Ekuador gjeti gati 8.8 tonë kokainë në një ngarkesë me banane të destinuara për në Belgjikë, shkruan Danas, përcjell Fol Drejt.
Komandanti i policisë Fausto Salinas tha se droga do të kishte vlerën e 330 milionë dollarëve nëse do të kishte dalë në treg.
Ekuadori është bërë një nga vendet kryesore të tranzitit për kokainën e prodhuar në Perunë dhe Kolumbinë fqinje.
Vitin e kaluar, më shumë se 200 tonë drogë u kapën në këtë vend të Andeve, shumica e tyre në portin e Guayaquil.
Meqenëse Ekuadori është eksportuesi më i madh në botë i bananeve, kontrabandistët shpesh përpiqen të fshehin dërgesat e paligjshme midis frutave që udhëtojnë nga Guayaquil në destinacione anembanë botës.
Konfiskimi i fundit i drogës ishte i paketuar në një kontejner plot me arka bananesh të destinuara për në Belgjikë.
Koha e sekuestrimit përkoi me vizitën e Ministres së Brendshme belge Anneliese Verlinden dhe Komisioneres Evropiane për Çështjet e Brendshme Ylva Johansson në Ekuador dhe Kolumbi.
Të dy zyrtaret duan të forcojnë bashkëpunimin me dy vendet e Amerikës së Jugut në luftën kundër trafikut të drogës.
Vitet e fundit, Belgjika është bërë vendi ku kapen sasitë më të mëdha të kokainës brenda Bashkimit Evropian dhe porti i Antwerpen është pika kryesore e hyrjes së drogës.
Drejtori i Qendrës Evropiane të Monitorimit për Drogën dhe Varësitë, Alexis Gozdil, tha në fillim të muajit se “i gjithë Bashkimi Europian kërcënohet nga një fluks në rritje i kokainës”.
“Jam thellësisht i shqetësuar që tregu në rritje i kokainës në BE po çon në një rritje të dhunës dhe korrupsionit në institucionet publike dhe administratën,” paralajmëroi ai.
Në Ekuador, dhuna e lidhur me trafikun e drogës është rritur në qiell pasi kartelet e fuqishme meksikane janë infiltruar në bandat lokale për të fituar kontrollin e biznesit fitimprurës.
Burgjet janë të mbipopulluara dhe pati dhjetëra të vdekur në përleshjet mes bandave rivale që gjenden prapa grilave. /FolDrejt/
