Emërimi i Nenad Rashiqit në krye të Ministrisë për Komunitete dhe Kthim, nga ana e Kryeministrit të Republikës së Kosovës Albin Kurti, ka ngjallur një valë reagimesh në Beograd, shkruan Fol Drejt.
Kryeministrja e Serbisë Ana Bërbabiq e ka komentuar një deklaratë të presidentit serb Aleksandër Vuçiq, i cili ndër të tjera ka thënë se “Kurti po i nxjerr nga fundi i vaskës bashkëpunëtorët e tij serbë!”
E ftuar në emisionin Hit Tweet në Pink TV, ajo i ka thënë se askush më mirë se sa Vuçiqi nuk e thotë të vërtetën:
“Nuk e dija për postimin në Twitter të Vesna Pusiqit ku ajo tregon potencialin e saj të jashtëzakonshëm demokratik, për këdo që i intereson që Serbia të përfaqësohet nga dikush që ka fituar 0.2 për qind në zgjedhje. E përgëzoj zonjën Trajkoviq, është një zonjë e guximshme që dëshironi të përfaqësojë serbët në Kosovë…” – tha ajo duke ironizuar.
Mandej shtoi:
“Ajo tha se serbët e vranë Oliver Ivanoviqin, as Kurti nuk do të thoshte gjëra të tilla. Çfarë lloj të vjellash nxjerr nga goja dhe gjithçka është në rregull dhe e pranueshme për të. E shqetëson kur Vuçiq thotë “Kurti i gjeti njerëzit nga fundi i vaskës”, pra çfarë duhej të thoshte: nga maja e vaskës? Ata janë atje diku, në atë vaskë, qoftë poshtë apo nga lart… Për sa i përket Trajkoviqit dhe Nenad Rashiqit, ata kanë imazhin të përfaqësojnë serbët me 1500 vota? Është turp, por Kurti gjeti në ta bashkëpunëtorë seriozë.”
Edhe e ashtuquajtura Zyra për Kosovën në Qeverinë e Serbisë, ka thënë se Kryeministri Kurti me emërimin e Nenad Rashiqit e ka shkelur kushtetutën – të cilën ata vetë nuk e njohin.
Integrimi i serbëve në Kosovë, është thënë disa herë, se pengohet nga vetë Beogradi zyrtar, ndërsa Lista Serbe s’është veçse një zgjatim i politikave ekspansioniste të Serbisë në raport me Kosovën.
Së fundi ata kanë shkaktuar një vakum institucional, për të cilin Qeveria e Kosovës është zotuar se do ta eliminojë. Emërimi i Rashiqit, Kryetar i Partisë Demokratike Progresive Serbe, në krye të një dikasteri qeveritar, shënjon hapin e parë drejt eliminimit të këtij vakumi. Ua kujtojmë se deri në fillim të nëntorit ky dikaster udhëhiqej nga Goran Rakiq, i cili dha dorëheqje bashkë me shumë politikanë, gjyqtarë, policë e nëpunës të tjerë të dirigjuar nga Lista Serbe, duke i kontestuar kështu vendimet e Qeverisë së Kosovës në lidhje me çështjen e targave./FolDrejt/
