Asociacioni i komunave me shumicë serbe është pranuar nga Kosova – ka thënë emisari gjerman për Ballkanin Perëndimor, Manuel Sarrazin, duke shtuar se ai pret që në ditët në vijim të dëshmohet kjo, shkruan Fol Drejt.
Në një intervistë për “Kossevin” ai ka thënë se “Asociacioni i Komunave me shumicë serbe, një temë mjaft e vështirë për palën kosovare, është gëlltitur tashmë.”
Sipas tij, sikurse Gjermania, “ashtu edhe partnerët ndërkombëtarë kanë qenë gjithmonë të qartë për faktin se presim që Kosova të përmbushë këtë dhe përshtypja ime është se kjo tani është pranuar edhe në Prishtinë. Mund ta kem gabim, por kjo është përshtypja ime nga takimet në Prishtinë – se ata kanë bërë një hap përpara. Dhe ne presim që ata të tregojnë atë në fushë në ditët apo javët në vijim.”
Sipas tij, në Ohër është manifestuar një vullnet politik, por ka pranuar se mbi palët është ushtruar edhe presion. Megjithatë “është vendimtare të dëshmohet tash vullneti politik, përmes zbatimit”, ka thënë ai.
Për sa i përket termit “vetëmenaxhim për serbët” që është përfshirë në nenin 7 të marrëveshjes, ai ka thënë se është e qartë se marrëveshjet e vitit 2013 dhe 2015 për Asociacionin duhet të përmbushen, pa u futur në shumë detaje në shtjellimin e termit.
“Neni 7 përshkruan se si duhet të bëhet. Megjithatë, nuk duhet të komentoj qartë se cila është saktësisht shkalla e pushtetit, pasi është jashtë kompetencës sime. Është e rëndësishme që ne të gjejmë një mënyrë për të arritur në procesin e gjetjes së qëllimit të duhur”, ka thënë Sarrazin.
Sarrazin e ka nisur “ekspeditën” e tij të punës me një vizitë zyrtare në Kosovë, ku është takuar me presidenten e Kosovës, Vjosa Osmani dhe kryeministrin Albin Kurti. Ai pritet që këtë ekspeditë ta vijojë edhe në Serbi, me ç’rast do të takohet me krerët më të lartë shtetëror atje./FolDrejt/
