Presidenti turk Rexhep Tajip Erdogan u kërkoi sot banorëve të provincës Adiyaman “falje” për ardhjen e vonuar të ekipeve të shpëtimit, duke pasur parasysh se zona në juglindje të vendit ishte ndër më të prekurat nga tërmetet e 6 shkurtit. raporton Anadolu Agency, përcjell Fol Drejt.
“Për shkak të efektit shkatërrues të dy tërmeteve dhe motit të papërshtatshëm, ne nuk mundëm të punonim siç deshëm në ditët e para të fatkeqësisë në Adiyaman. Për këtë kërkoj që të më falni”, tha Erdogan gjatë vizitës së tij në Adiyaman.
Presidenti i Turqisë mbërriti në atë qytet tre javë pas tërmetit që mori jetën e më shumë se 50,000 njerëzve në Turqi dhe Sirinë fqinje.
Presidenti turk, i cili ka qenë në pushtet për 20 vjet dhe synon të mbajë postin e tij pas zgjedhjeve të planifikuara për 14 maj, është kritikuar ashpër për ngadalësinë e shtetit në ndihmën ndaj viktimave.
“Aq shumë ndërtesa dhe struktura u shkatërruan, sa për fat të keq nuk ishim aq shpejt sa shpresonim,” tha Erdogan.
Ai pranoi “dështimet” në reagimin ndaj tërmeteve, duke shtuar se “ishte e pamundur të ishe plotësisht i përgatitur për një fatkeqësi të këtij niveli”. Në provincën Adiyaman dhe Hatay, njerëzit shprehën pakënaqësi të madhe me reagimin e qeverisë ndaj fatkeqësisë natyrore.
Një banor i Adiyamanit, Mehmet Yildirim, pohon se 34 orë pas tërmetit të parë, ai nuk pa asnjë përfaqësues të qeverisë apo shtetit, as policinë apo ushtrinë, ata.
Sot, Erdogan premtoi të ndërtojë rreth 50,000 apartamente të reja në Adiyaman. Rreth 309,000 njësi banimi duhet të ndërtohen në 11 provinca të prekura nga tërmetet shkatërruese. /FolDrejt/
