Presidenti i Turqisë, Rexhep Tayyip Erdogan, ka deklaruar se Izraeli, me mbështetjen e SHBA-së dhe Evropës, gjatë 25 ditëve të fundit po kryen krime kundër njerëzimit në Gaza.
Erdogan tha se Izraeli e ka humbur plotësisht arsyen e ekzistencës së tij. Ai theksoi se Izraeli po vepron si një organizatë dhe duhet të ndalet, shkruan AA, përcjell Fol Drejt.
Presidenti turk gjithashtu theksoi se “diskutimet tona janë në vazhdim për të siguruar që autorët e krimeve të luftës në Gaza të mbahen përgjegjës”.
“Ata që sot janë spektator të vdekjes së mijëra fëmijëve të Gazës, nesër nuk do të kenë kredibilitet për asgjë që mund të thonë për çfarëdo teme”, tha ai.
Për të parandaluar masakrën në Gaza, tha më tej presidenti Erdogan, duhet shpallur armëpushimi, i ndjekur nga rruga drejt paqes së qëndrueshme.
“Konferenca ndërkombëtare e paqes për çështjen e Palestinës dhe Izraelit, me pjesëmarrjen e të gjitha palëve përkatëse, do të ishte platforma më e përshtatshme për paqen”, u shpreh ai.
