Presidenti i Turqisë, Rexhep Tajip Erdogan, foli në Asamblenë e Përgjithshme të rregullt të eksportuesve turq dhe tha se Turqia do të vazhdojë të forcojë eksportin e produkteve të saj në periudhën e ardhshme, por në të njëjtën kohë do të luftojë edhe me uljen e inflacionit, transmeton Klix, përcjell Fol Drejt.
Gjatë bisedës me biznesmenët turq, Erdogan tha se secili prej tyre është bërë simbol i fuqisë në rritje të kapaciteteve prodhuese të ekonomisë turke.
“Ju jeni mishërimi i recetës sonë kombëtare me punësimin që siguroni dhe eksportet. Sot edhe në vendet më të largëta të botës kemi produkte me vulën “Made in Turkey”. Pjesën më të madhe të meritave e kanë eksportuesit tanë”, tha Erdogan.
Ai thekson se viti 2022 ishte një vit rekord sa i përket eksporteve turke.
“Eksportet tona të mallrave u rritën me 12.99 për qind dhe arritën në 254.2 miliardë dollarë. Eksportet e shërbimeve tona kaluan 90 miliardë dollarë me një rritje prej 47.3 për qind. Eksportet tona të mbrojtjes arritën në 4.3 miliardë dollarë me një rritje prej 37 për qind. Numri i kompanive eksportuese u rrit me 14 për qind krahasuar me 2022 dhe arriti në 114.561”, tha Presidenti i Turqisë.
Një nga temat gjatë fjalimit ishte inflacioni dhe Erdogan theksoi se do të gjente një zgjidhje për ta ulur atë.
“Ne do ta reduktojmë sërish çështjen e inflacionit në vlera njëshifrore. Duke hequr pasigurinë zgjedhore kemi një ‘dorë më të fortë’ në këtë drejtim. Prioriteti i parë i ekonomisë tonë është zgjidhja e kësaj çështjeje. Problemi ynë më i madh në tregtinë e jashtme është barra e energjisë dhe ne do ta minimizojmë atë me gazin e Detit të Zi, një termocentral bërthamor Akkuyu dhe burimet e rinovueshme të energjisë”, tha Erdogan.
Pavarësisht problemeve të shumta, Erdogan tha se synimi i Turqisë është të rrisë eksportet në vitet e ardhshme.
“Ne duam të rrisim eksportet në 285 miliardë dollarë vitin e ardhshëm. Synimi ynë për vitin 2028 është të arrijmë eksporte prej 400 miliardë dollarësh”, tha presidenti turk. /FolDrejt/
