Presidenti turk Rexhep Tajip Erdogan iu referua edhe një herë fitores së tij në zgjedhje dhe përshëndeti hyrjen e Turqisë në një epokë të re, raporton Klix, përcjell Fol Drejt.
Duke iu drejtuar një tubimi në Ankara, Erdogan tha se zgjedhjet e fundit, në të cilat ai doli si fitues, i dhanë fund debatit për sistemin e vjetër.
“Epoka e koalicioneve nuk do të kthehet më pas këtyre zgjedhjeve. Teksa festojmë njëqindvjetorin e Republikës, po lundrojmë drejt horizonteve të reja. “Shekulli i Turqisë” është përpara nesh dhe është një shenjë vendosmërie për të arritur qëllime më të mëdha, arritjen e synimeve shekullore. Demokracia turke është fituesi më i madh i këtyre zgjedhjeve”, tha Erdogan.
Gjatë fjalimit, Erdogan iu referua pretendimeve të analistëve dhe politikanëve perëndimorë se ai kishte krijuar një sistem qeverisjeje autokratike.
“A detyrohen diktatorët të konkurrojnë në raundin e dytë? pyeti Erdogan.
Kujtojmë se në raundin e dytë të zgjedhjeve presidenciale, i cili u mbajt më 28 maj, Rexhep Tajip Erdogan fitoi 52.18 për qind të votave, që i dha një mandat të ri pesëvjeçar si kreu i Turqisë.
Nga ana tjetër, kundërshtari i tij Kemal Kilicdaroglu, përfaqësues i opozitës së bashkuar, fitoi 47.82 për qind të votave. /FolDrejt/
