Është bërë përparim në bisedimet ndërmjet Ministrisë së Transportit të Gjermanisë dhe Komisionit Evropian për përfundimin e planifikuar të prodhimit të makinave me motorë me djegie të brendshme nga viti 2035, njoftoi sot Ministria gjermane e Transportit, raporton Klix, përcjell Fol Drejt.
Pas muajsh negociatash, Parlamenti Evropian, Komisioni Evropian dhe anëtarët e BE-së arritën një marrëveshje vitin e kaluar për një ligj sipas të cilit makinat e reja të shitura në BE do të kenë zero emetim të dioksidit të karbonit nga viti 2035, gjë që do ta bënte të pamundur shitjen e makinave me motorët me djegie të brendshme.
Ligji i BE-së për makinat që lëshojnë dioksid karboni është aktualisht i bllokuar pasi ministri gjerman i Transportit Volker Wissing kundërshtoi në minutën e fundit, duke habitur anëtarët e tjerë dhe eurodeputetët që kishin miratuar më parë rregulloren e re.
Megjithatë, anëtarët e BE-së kanë nevojë për miratimin e vendimit përpara se të hyjë në fuqi.
Vissing deklaroi në fund të muajit se përdorimi i lëndëve djegëse sintetike duhet të jetë i mundur edhe pas afatit të vitit 2035 dhe kërkoi nga Komisioni Evropian një propozim që do ta mundësonte këtë.
Prandaj votimi i ligjit të ri është “ngrirë” derisa të marrë miratimin përfundimtar.
Kujtojmë se vendimi që vetëm automjetet elektrike mund të shiten nga 1 janari 2035 është një kontribut për arritjen e synimit të Bashkimit për të qenë neutral ndaj klimës deri në vitin 2050 – si pjesë e botës pa emetim të dëmshëm të gazit. Kalimi nga lëndët djegëse fosile në burimet e rinovueshme të energjisë në trafik është një nga segmentet më domethënëse të tranzicionit të energjisë, jo vetëm në Evropë, por në mbarë botën. /FolDrejt/
