Në rrënojat e qytetit të lashtë romak të Pompeit, janë gjetur eshtrat e dy njerëzve që besohet se kanë vdekur në tërmetin që pasoi shpërthimin e malit Vezuv në vitin 79 pas Krishtit, transmeton Klix, përcjell Fol Drejt.
Skeletet, që besohet se i përkasin dy burrave në mesin e të 50-tave, u gjetën gjatë gërmimeve në Insula dei Casti Amanti, një zonë e Pompeit që përbëhet nga një grup shtëpish dhe një furrë buke.
Nën murin e shembur u gjetën mbetje të ruajtura mirë. Frakturat e kockave tregojnë se burrat ka të ngjarë të kenë vdekur nga dëmtimet e shumta të marra kur ndërtesa ku po strehoheshin u shemb në një tërmet në fillim të shpërthimit të vullkanit.
Një nga viktimat besohet se ka ngritur krahun në përpjekje për t’u mbrojtur nga rënia e murit.
Besohet se muri u shemb para ardhjes së rrymave të fuqishme piroklastike, të cilat u krijuan nga rrjedha e llavës dhe që varrosën qytetin.
Gabriel Zuchtriegel, drejtor i Parkut Arkeologjik të Pompeit, tha se zbulimi solli edhe më shumë detaje dhe tregoi “ferrin” e dimensionit njerëzor të tragjedisë.
“Pompei është një laborator i madh arkeologjik që ka rifituar fuqinë e tij vitet e fundit, duke mahnitur botën me zbulimet e vazhdueshme që po bëhen dhe duke demonstruar përsosmërinë italiane në këtë fushë”, tha ministri i Kulturës Gennaro Sangiuliano.
Zbulimi i fundit i mbetjeve njerëzore ishte në vitin 2020, kur skeletet e dy burrave, që besohet se ishin një njeri i pasur dhe skllavi i tij, u gjetën gjatë gërmimeve në një vilë në periferi të qytetit.
Dy burrat, të cilët ishin shtrirë afër njëri-tjetrit, besohet se i kanë shpëtuar fazës fillestare të shpërthimit kur qyteti u mbulua nga hiri vullkanik, për t’u vrarë nga një shpërthim të nesërmen. /FolDrejt/
