Është rritur në 208 numri i të vdekurve nga fatkeqësia e shkaktuar nga tajfuni Rai i cili goditi pjesët qendrore dhe juglindore të Filipineve, transmeton Fol Drejt.
Sipas lajmit të BBC, tajfuni i cili arriti një shpejtësi prej 195 kilometrash në orë, shkaktoi ndërprerje të energjisë elektrike dhe shkatërrime serioze në shumë rajone.
Në përmbytjet, stuhitë e forta dhe shkatërrimet e tajfunit që goditi zonat qendrore dhe juglindore të vendit, është rritur në 208 numri i personave që kanë humbur jetën kryesisht në rajonet Cebu dhe Bohol, shkruan AA.
Aktivitetet e kërkimit vazhdojnë për 52 persona ndërkohë bëhet e ditur se nga tajfuni janë plagosur të paktën 239 persona.
Ekipet e shpëtimit pamjet me të cilat janë përballur i kanë cilësuar si “shkatërrim i plotë”. Në anën tjetër shprehen shqetësime se mund të rritet më shumë numri i viktimave si pasojë e përmbytjeve dhe rrëshqitjet masive të dheut.
Kreu i Kryqit të Kuq të Filipineve, Richard Gordon tha se disa rajone duken sikur janë bombarduar.
Arthur Yap, guvernatori i rajonit Bohol, ka udhëzuar kryetarët e bashkive brenda kufijve administrativë të provincës për të mbështetur përpjekjet e ndihmës emergjente dhe për të përmbushur nevojat urgjente të njerëzve si ushqim dhe ujë.
Reshjet intensive të shiut dhe stuhia nga tajfuni shkaktuan rënien e pemëve, përmbytje dhe dëmtimin e shtëpive dhe rrugëve në shumë fshatra.
Rreth 780 mijë njerëz janë prekur nga fatkeqësia ndërsa 300 mijë janë evakuuar dhe janë strehuar në zona të sigurta. Ushtria filipinase dërgoi trupa në rajon për të mbështetur përpjekjet e ndihmës urgjente dhe të kërkim-shpëtimit.
Presidenti filipinas, Rodrigo Duterte, i cili inspektoi rajonin, tha se do të ofrohet një ndihmë prej 40 milionë dollarësh.
Në Filipine ndodhin mesatarisht 20 stuhi dhe tajfune çdo vit. Në vitin 2013, tajfuni Haiyan, i njohur si më vdekjeprurësi në vend, shkaktoi mbi 6.000 të vdekur dhe la pas një shkatërrim masiv.
