Në kohën kur bota rënkon për shpërndarjen e furishme të virusit Covid19, janë disa shtete dhe firma farmaceutike të cilat po garojnë për të zbuluar ilaçin ose vaksinën kundër këtij virusi, shkruan foldrejt.com.
“Mes Gjermanisë dhe SHBA-së ka një luftë mbi një biznes në Tübinger, CureVac, e cila, po punon intensivisht për gjetjen e vaksinës kundër virusit Korona,” shkruan media konservatore gjermane Welt am Sonntag.
Presidenti amerikan Donald Trump kërkonte që shkencëtarët gjermanë të përfitojnë shuma të majme parash, por medikamenti i zbuluar të përdorej ekskluziv për vendin e tij. Lajmi është konfirmuar për median gjermane nga disa qarqe qeveritare në Berlin.
CureVac punon në bashkëpunim me institutin tjetër gjerman Paul-Ehrlich-Institut.
“Shitja ekskluzive e ndonjë vaksine të zbuluar për SHBA-në, duhet të shmanget me të gjitha mundësitë. Kapitalizmi ka kufij,” thonë nga partia e majtë SPD, Karl Lauterbach. Ai poashtu ka kërkuar pavarësi farmaceutike nga SHBA dhe Kina.
Poashtu shumë figura gjermane kanë kritikuar Trumpin, që edhe në këto momente nuk mendon për njerëzimin por për “America first”.
Qeveria gjermane javën e kaluar shpërndau 140 milion euro për zbulimet kundër virusit Covid19 dhe se zbulimi eventual do jetë për gjithë njerëzimin dhe jo për shtete individuale ose rajone të veçanta./Foldrejt.com
