Po vijojnë përplasjet ndërmjet sindikalistëve dhe partisë në pushtet. Së fundi eksponentët e saj kanë filluar të hedhin dyshime mbi qëllimin e grevës, duke i vënë në pikëpyetje pastërtinë e figurave të anëtarëve të Sindikatës së Bashkuar të Arsimit, Shkencës dhe Kulturës (SBAShK), por edhe qëllimeve të vetë grevës, shkruan Fol Drejt.
Orë më parë, Elvis Hoxha nga radhët e Lëvizjes Vetëvendosje plasoi një shkrim të shkurtër në murin e tij, në Facebook, nëpërmjet të cilit vinte në dyshim qëllimin e grevës, duke ia kujtuar opinionit publik se kjo gjë po ndodh në një kohë, kur qeveria aktuale po provon ta forcoj sovranitetin e shtetit, në të gjithë cepat e republikës.
“Nuk është aspak e çuditshme që Rahman Jashari përdor grevën e mësuesve pikërisht kur duhet të forcohet sovranitetit në veri” – ka shkruar ndër të tjera Hoxha, ndërsa të menjëhershme kanë qenë reagimet.
Avokati Ali Sefaj nga Këshilli Grevist i është kundërpërgjigjur, duke ia kujtuar se Jashari është sprovuar edhe në kuptimin patriotik dhe se pastërtia e figurës së tij, madje edhe e familjes së tij, nuk guxon të vihet në dyshim:
“Rrahman Jashari vjen prej familjeve me të forta dhe me patriotike në dukagjin. Kushdo që synon me akuzu Rrahmanin, njeriun qe është rrahur dhjetra herë nga policia serbe në vitet e 90 për shkollën shqipe, bëhet argat i Serbisë me ose pa dijen e tij.”
Kjo përplasje ka ndodhur në distancë, ndërkohë që disa nuk janë kursyer ta vënë në pikëpyetje saktësinë e pretendimeve të Hoxhës, edhe te vetë muri i tij.
Korab Blakaj i ka komentuar në mur Hoxhajt duke i thënë se këto pretendime të vetëvendosjes, nuk kanë bazë:
“Kush është anëtari i partisë serbe prof Elvis? Mësuesit janë shtylla e patriotizmit në Kosovë historikisht. Vërtetë mendon që komplet kjo armatë ka zgjedhur t‘i përfaqësojë „ anëtari i partisë serbe„? Si ka mundësi që ata nuk e njohekan udhëheqësin e tyre sindikal? Bashkimi prof Elvis nuk vjen duke linçuar kategori të tëra njerëzish! Kur ju vetë e bëni këtë, si prisni t‘ju konsiderojnë ndryshe përveç separatistë?”
Ndërkaq Sefaj ka kërkuar nga kryeministri Albin Kurti të distancohet nga këto shpife të këshilltarit të tij, ndërsa nga ky i fundit ka kërkuar që të kërkoj falje publike.
Për më shumë, lexojini të plota këto përplasje:
ELVIS HOXHA:
Sa herë, përgjatë këtyre viteve të aktivizmit në Kosovë, kam përmendur me emër Hashimin, Ramushin dhe Isën, kanë qenë të shumë ata që më kanë thënë se shqiptarët e Shqipërisë nuk kanë punë në Kosovë.
Një gjë dihet më siguri. Ndarja mes shqiptarëve vjen ose nga agjenturat, ose nga korrupsionit ose nga pushtimi. Të tre këta fenomene ne i kemi lejuar vetë. Kur nuk jemi të pushtuar, jemi të korruptuar. Gjithnjë kemi pasur mes nesh njerëz që korruptohen ose që ndihmojnë pushtimin dhe korruptimin. Dhe janë po të njëjtët që e duan bashkimin e shqiptarëve vetëm si bashkim bandash dhe krimi të organizuar.
Natyrisht që organizimi i bandave nis në veri të Kosovës. Nuk është aspak e çuditshme që Rahman Jashari përdor grevën e mësuesve pikërisht kur duhet të forcohet sovranitetit në veri. Ajo që është e dhimbshme, është pjesëmarrja e mësuesve në këtë grevë që ka për shef anëtarin e partisë serbe.
Secili vijon me agjendat e veta. Por ai që më thotë mua se jam non gratta në Kosovë, sigurisht që sheh me dëshirë bashkëpunimin me serbët dhe krimin.
Edhe Ballkani i Kapur është projekt turistik për serbët dhe izolues për shqiptarët.
ALI SEFAJ:
Rrahman Jashari vjen prej familjeve me të forta dhe me patriotike në dukagjin.
Kushdo që synon me akuzu Rrahmanin, njeriun qe është rrahur dhjetra herë nga policia serbe në vitet e 90 për shkollën shqipe, bëhet argat i Serbisë me ose pa dijen e tij.
Kryeministër Albin Kurti distancohu nga shpifja e këshilltarit Elvis Hoxha.
Elvis Hoxha Kërko falje, nëse ke një grimë shqiptari në mëndje dhe zëmer.
Ps: Rrahmani mundet mos me ju pelqy, mos me qenë dakord me formatin e veprimit sindikal që ka zgjedhur ai, por me shpifë se ka qenë pjesë e listave të partive serbe është me shumë sesa poshtërsi!
