Mbrëmë pasdite është raportuar se kryetari i Lidhjes Demokratike të Kosovës (LDK), bashkë me tri ndër figurat më aktive të kësaj partie në Kuvendin e Kosovës: Avdullah Hoti, Armend Zemaj dhe Arben Gashi, janë kërcënuar, shkruan Fol Drejt.
Rastin në fjalë e konfirmoi edhe Policia e Kosovës:
“Policia e Kosovës, në këtë rast drejtoria kompetente e PK-së, ka ndërmarr të gjitha veprimet e nevojshme policore lidhur me rastin/kanosjen në fjalë. Të gjitha veprimet e mëtejme policore do të ndërmerren në bashkëpunim dhe koordinim me organet e drejtësisë.”
Se ka pasur një plan “të strukturuar” për atentat ndaj Abdixhikut, u tha edhe nga deputeti Kujtim Shala. Ai mbrëmë në një emision televiziv tha se agjencitë inteligjente të një shteti mik, kanë përgjuar një grup të dyshimtë i cili besohej se do ta kryente këtë akt:
“Mund të konfirmojë se ka pasur një lloj planifikimi në Kosovë dhe disa vende të BE-së dhe jashtë territorit të Evropës. Individët kanë rënë pre e përgjimeve të njërës prej agjencive inteligjente kryesore të një vendi të BE-së. Nga ajo që na është thënë ka pasur një plan të strukturuar për atentat ndaj Abdixhikut dhe tre deputetëve të LDK-së”, tha ai.
Për më shumë, në këtë histori, sipas Shalës, janë involvuar dy organizata, njëra prej të cilave vepron jashtë, e tjetra brenda Kosovës./FolDrejt/
