Rasti i djeshëm i cili e tronditi opinionin publik në Kosovë, ku një e moshuar keqtrajtohej fizikisht nga një staf infermieresh në një shtëpi pleqsh në Pejë, është shfrytëzuar për propagandë nga mediat serbe, shkruan Fol Drejt.
Disa prej tyre e kanë përshkruar rastin si “maltretim ndaj të moshuarës serbe nga një shqiptare”.
Eksperti i sigurisë Agim Musliu, këtë e ka cilësuar si pjesë të “luftës hibride” që serbët dhe rusët po e bëjnë ndaj Kosovës.
“Lufta hibride serbo-ruse ndaj Kosovës është bërë vërtetë e një intensiteti të lartë. Pas kërcënimeve me praninë e ushtrisë së Serbisë në kufi me Kosovën; pas sabotimit të policëve serbë të Policisë së Kosovës për t’i kryer detyrat shtetërore sipas hierarkisë (në prani të eksponentëve të Listës Serbe), tash na del edhe elementi dezinformues në shesh.
Një keqpërdorim i skajshëm (por të cilin jemi mësuar ta shohim në vazhdimësi), i fakteve nga propaganda serbo-ruse.
Videoja e keqpërdorimit të një gruaje të shtyre në moshe nga punëtore të papërgjegjshme në Pejë (që bëri bujë sot në mediat tona), në Serbi po përdoret shumë se “viktima është një plakë serbe”, e cila sipas tyre” maltretohet nga motra medicinale shqiptare”. Ky rast është njëri nga shembujt më të freskët të makinerisë së luftës speciale të Beogradit” – ka shkruar Musliu.
Duket që videoja ka marr vëmendje të madhe edhe në serbi, ndërsa dyshohet që prapa shpërndarjeve masive të videos në rrjetet sociale, qëndrojnë strukturat e sigurisë serbe./FolDrejt/
