Mediat në Serbi i janë referuar Raportit të fundit të Departamentit të Shtetit, i cili hedh dritë edhe mbi dukurinë e trafikimit të qenieve njerëzore, duke e përshkruar Kosovën si vend ku shiten dhe shfrytëzohen seksualisht vajzat serbe, shkruan Fol Drejt.
Artikujt me tituj tendencioz: Vajzat nga Serbia shiten në Kosovë për prostitucion; pretendojnë se viktimat bien pre e premtimeve për martesë dhe punë, por përfundojnë në bordello, pa e specifikuar nëse veprimtaria shtrihet në tërë territorin e Kosovës, apo vetëm në qytetet me shumicë serbe.
“Departamenti Amerikan i Shtetit theksoi në raportin për trafikimin e qenieve njerëzore për vitin 2022 se vajzat nga Serbia, si dhe nga Mali i Zi, Shqipëria, Moldavia, Rumania dhe Mali i Zi shiten në territorin e Kosovës për qëllime të shfrytëzimit seksual” – shkruan Blic.rs
Por për Qeverinë e Kosovës, i njëjti raport, e përshkruan Kosovën me një gjuhë pozitive.
“Ky raport i klasifikon vendet në tri nivele. Kosova vazhdon të renditet në nivelin e dytë. Ngjashëm sikur një vit më parë, raporti thekson se Qeveria e Kosovës nuk i përmbush plotësisht standardet minimale për eliminimin e trafikimit, por që po bën përpjekje të konsiderueshme për një gjë të tillë.
“Qeveria e Kosovës demonstroi përpjekje të përgjithshme në rritje krahasuar me periudhën e mëparshme të raportimit, duke marrë parasysh ndikimin e pandemisë COVID-19 në kapacitetin e saj antitrafik, ndaj mbeti në nivelin e 2-të”, thuhet në raport” – thuhet në një komunikatë të lëshuar dje nga Zyra Për Komunikim Publik e Qeverisë së Kosovës.
Por mediat serbe, nuk kanë mundur ta mohojnë faktin se trafikimi me qenie njerëzore, është një veprimtari kriminale që shtrihet edhe brenda Serbisë.
“Siç shpjegon raporti, trafikantët rekrutojnë gra dhe vajza me premtime për martesë ose punësim si kërcimtare dhe këngëtare, por në vend të kësaj i detyrojnë të prostitucionin në shtëpi dhe apartamente private, klube nate dhe sallone masazhi.
Në raport thuhet se raste të shfrytëzimit seksual të grave nga Serbia janë regjistruar në vetë Serbinë, si dhe në vendet përreth, ndërsa shfrytëzimi për punë i burrave nga Serbia kryhet kryesisht në vendet e Evropës Perëndimore, në Gjermani, Austri, Luksemburg. …
Në raport thuhet gjithashtu se Qeveria e Serbisë ka njohur 127 raste të mundshme të trafikimit të qenieve njerëzore, prej të cilave 43 janë identifikuar” – shkruan Blic.rs
Nga ana tjetër, në komunikatën e lëshuar nga Qeveria e Kosovës numërohen rezultatet e institucioneve të rendit në luftën kundër trafikimit të qenieve njerëzore:
“Në raport theksohet se Policia hetoi 17 raste të reja me 43 të dyshuar, krahasuar me 62 raste të reja në vitin paraprak të raportimit. Policia hetoi gjithashtu shtatë të dyshuar të tjerë për “shfrytëzim të shërbimeve seksuale nga një viktimë e trafikimit”, krahasuar me nëntë të dyshuar në vitin paraprak. Autoritetet ndoqën penalisht 35 raste të reja, me 60 të pandehur, krahasuar me 20 raste të reja me 32 të pandehur në vitin paraprak. Gjykatat dënuan shtatë trafikantë, krahasuar me tre në vitin paraprak. Gjykatësit vazhduan të shqiptojnë dënime nën kufirin minimal prej pesë vjetësh heqje lirie. Derisa një gjykatës dënoi një trafikant me pesë vjet heqje lirie, katër trafikantë u dënuan me tri vjet, një u dënua me dy vjet me kusht dhe me gjobë prej 300 eurosh. Prandaj, raporti thekson s dënimet me kusht dhe ato të gjobave zhvlerësuan përpjekjet për t’i mbajtur trafikantët përgjegjës, dobësuan parandalimin, krijuan shqetësime të mundshme për sigurinë e viktimave dhe nuk ishin të barasvlershme me seriozitetin e krimit.”
Duket që të gjeturave të të njëjtit raport, pala serbe i ka dhënë konotacion tjetër./FolDrejt/
