“Xhamia Aksa ndodhet në lutjet e popullit turk. Palës izraelite ia kemi shprehur qartë ndjeshmërinë e Turqisë për Kudsin dhe Xhaminë Al-Aksa”, ka thënë shefi i diplomacisë turke
Ministri i Jashtëm i Turqisë, Mevlüt Çavuşoğlu, vizitoi Xhaminë Al-Aksa në Kudsin Lindor të pushtuar, shkruan AA, transmeton Fol Drejt.
Ministri Çavuşoğlu ka ecur në këmbë drejt Aksasë nga zona e Qytetit të Vjetër të Kudsit Lindor nën okupim.
Gjatë vizitës në Administratën e Vakëfeve Islame të Kudsit, e cila është përgjegjëse për administrimin e Xhamisë Al-Aksa, Çavuşoğlu u takua me kreun e Administratës Azzam Al-Khatib .
Sipas informacioneve të marra nga burimet diplomatike, mësohet se Çavuşoğlu në bisedë është shprehur: “Xhamia Aksa ndodhet në lutjet e popullit turk. Palës izraelite ia kemi shprehur qartë ndjeshmërinë e Turqisë për Kudsin dhe Xhaminë Al-Aksa”.
Ndër të tjera, Çavuşoğlu ka deklaruar se kanë ndërmarrë çdo përpjekje që Organizata e Bashkëpunimit Islam dhe të gjitha vendet islame të mos harrojnë Kudsin dhe Xhaminë Al-Aksa.
Ministri Çavuşoğlu pas takimit me zyrtarët e Vakëfeve vizitoi Kupolën e Shkëmbit dhe Xhaminë Kible.
Disa muslimanë që po kryenin adhurim në Xhaminë Al-Aksa mirëpritën ministrin Çavuşoğlu dhe kërkuan të bënin fotografi me të.
