Ministrja e Drejtësisë Albulena Haxhiu është përplasur në rrjetet sociale me një qytetar, shkaku i një postimi me të cilin qytetari ka ironizuar. Puna ka shkuar aq larg sa ministrja e ka kërcënuar se do ta raportojë në polici dhe se rastet e tilla “duhet të ndiqen penalisht”, sipas saj, shkruan Fol Drejt.
I gjithë “sherri” filloi kur ministrja bëri një postim, që duket si një kundërpërgjigje ndaj deklaratave të Këshillit Gjyqësor të Kosovës (KGjK). Nëpërmjet këtij postimi ajo provonte të ilustronte pafuqinë e sistemit gjyqësor për t’i luftuar rastet e rënda, siç janë ato të dhunimeve:
“Sot, prindi i një vajze 14 vjeçare, erdhi në Ministrinë e Drejtësisë, na njoftoi që në dhjetor të vitit 2021, ka pasur tentim dhunim të vajzës së tij 14 vjeçare. Ndonëse emri dhe mbiemri i personit të dyshuar dihet, i njëjti nuk është dënuar dhe as nuk është në burg. Personi i dyshuar është i lirë!
*Postimi më lartë është bërë me lejen e prindit” – ka shkruar Haxhiu.
Por ishte Korab Blakaj ai i cili ironizoi me postimin duke shkruar kësisoj:
“Në vitin 2000, moshën 14 vjeqare më kanë dhunuar seksualisht dy gra në një dasëm!
Prokuroria i ka lënë të lirë, sot e asaj dite enden të lira duke kërkuar viktimat fatkeqe të radhës!
Postimin e bëj publik me leje të Ministres Albulena Haxhiu”
Duket që postimi i këtij të fundit i ka penguar shumë, aq sa ministrja e ka interpretuar si tallje me fëmijët e dhunuar:
“Personat e tillë që tentojnë të tallen me fëmijët e dhunuar, duhet të ndiqen penalisht dhe qysh nesër do ta raportoj në polici!”
Mirëpo njohës të fushës së drejtësisë, avokatë dhe miq të ministres, e kanë këshilluar atë që të mos i futet kësaj loje, meqë në tekstin e Blakajt, sipas tyre, reflekton ironia dhe sarkazma dhe nuk ka bazë për ndjekje penale:
“Statusi po tingëllon rëndë, shumë rëndë, po nuk është vepër penale.
Korabi ka bërë satirë, tallje, humor.
Nuk po më pëlqen as mua, por Korabit nuk mundemi me ia ndalë lirinë e shprehjes.
Revista javore satirike Charlie Hebdo, e ka satirën edhe më të rëndë, por nuk i bëjnë kallëzime penale” – i ka komentuar në murin e ministres, avokati Arianit Koci.
Juristi Durim Berisha, po ashtu, e ka cilësuar si tallje komentin e Blakajt, ndërsa reagimin e ministres, si paaftësi:
“Korab Blakaj e paska përqeshë pak nivelin e ministres Albulena Haxhiu. Kjo e fundit paska shkru se ka me e denoncu ne polici nesër ne mëngjes.
Për çfarë vepre penale don me e denoncu Korabin, znj. Ministre?
Vepra penale e talljes me budallakitë e ministrave nuk parashihet ne Kodin Penal.
Për futkotizem dorëheqjet një minister në cilindo shtet normal.”
Edhe avokati Besnik Berisha është involvuar në debat, duke e cilësuar reagimin e Haxhiut si padituri:
““Padijenia s’paska kufi! Me ndjek penalisht dikë për këtë koment?!! Kjo s’bën vaki as në Bangladesh e Kore Veriore, e lëre me në një vend demokratik ku vepra penale është e përcaktuar me ligj e jo me maliq. Profesorët i kanë fajet, definitivisht!”, shkruan avokati.
Ende nuk dihet nëse ajo do të tërhiqet, apo kërcënimi i saj, do të mbetet thjesht, “dekor” në murin e llogarisë në Facebook./FolDrejt/
