Këshilltari politik i Kryeministrit Albin Kurti ka nxitur reagime në rrjetet sociale me një deklaratë të ashpër në adresë të Ramush Haradinajt, ku ndër të tjera thotë se ai po ankohet pse Serbia nuk e ka vrarë Albin Kurtin në burg, “pa dhënë përgjigje pse nuk e ka vrarë Ramushin gjatë luftë por vëllezërit e tij”, shkruan Fol Drejt.
Mirëpo të menjëhershme kanë qenë reagimet në rrjetet sociale, ku nuk janë kursyer as ofendimet.
Me këtë rast kanë reaguar edhe nga Aleanca për Ardhmërinë e Kosovës (AAK).
Zëdhënësi i AAK-së, Lulëzim Blaka ka shkruar se “Feraj s’ka qenë i rrezikuar as të burgoset e as të vritet. Në kohën kur shqiptarët burgoseshin, luftonin e vriteshin ai ishte nëpër skuta”.
Duke shtuar më tej se:
“Nuk mund të jesh shqiptar nëse e urren kaq shumë UÇK-në, krenarinë e kombit tonë”, ka shkruar Blaka.
Ndërkaq, edhe më i ashpër ka qenë i pari i Deçanit – Bashkim Ramosaj, i cili nuk e ka kursyer Ferajn as nga fyerjet.
Duket që Ramosaj i ka rënë pishman për gjuhën e përdorur, sepse më pas e ka fshirë postimin.
Ende nuk dihet qëndrimi i Kryeministrit Albin Kurti në lidhje me këto përplasje. Nga kryeministria sot kanë bërë të ditur se ai ka udhëtuar për në Japoni./FolDrejt/
