Sot rreth orës 10:40 në ujërat e lumit Vardar në afërsi të kazermës Erebino, pranë një ure, nga policia është gjetur trupi i pajetë i studentit 22-vjeçar nga Kumanova, i cili pesë ditë më parë ishte aksidentuar rëndë me veturën e tij derisa po udhëtonte drejt Universitetit të Tetovës, njofton FolDrejt.com
Trupi i viktimës u gjet sot afër 1 km nga vendi ku u aksidentua, ndërsa familjarët e kanë identifikuar dhe njohur Erdon Ramadanin. Ai është 22-vjeçari nga Kumanova, student i dalluar i sociologjisë, i cili më 27 shtator ra nga ura në afërsi të fshatit Zhelinë, derisa po udhëtonte për ta paguar semestrin e fundit të fakultetit.
“Pas gjetjes së trupit, identifikimi është kryer nga familjarët më të afërt. Ekzaminimi është kryer nga mjeku i Mjekësisë Ligjore, ndërsa prokurori publik ka urdhëruar kryerjen e obduksionit të trupit”, ka thënë zëdhënësi i RSV Tetovë, Marjan Josifoski.
Trupi i pajetë i studentit Erdon Ramadanit tani ndodhet në morgun e Tetovës, ku pritet të bëhet obduksioni. Ditët e fundit në kërkim të të riut nga Kumanova kanë marrë pjesë përfaqësues të shumë institucioneve, ku janë përfshirë edhe zhytës dhe qen gjurmues.
Për familjarët dhe gjithë Kumanovën ishin këto ditë të rënda ankthi e pritje të ndonjë lajmi, i cili fatkeqësisht sot ishte shumë pikëllues./FolDrejt/
