Ndërsa çmimet e produkteve bazë po “fluturojnë” duke shënjuar një rritje enorme për një kohë tejet të shkurtër, autoritetet vendore nga ana tjetër, thonë se nuk ka vend për panik.
Që nga Kryeministri Albin Kurti e Ministrja Rozeta Hajdari, e deri te Shoqata e Mullisëve të Kosovës, janë deklaruar se nuk ka vend për shqetësim, transmeton Fol Drejt.
“Në muajin e kaluar kanë bluar grurë dhe tash ka miell edhe për së paku tre muaj. Tre muaj plus dy muaj” – u shpreh ndër të tjera Kryeministri Kurti, gjatë një konference për media.
Nga ana tjetër, Ministrja Hajdari tha se vendi ynë nuk varet nga importi i grurit ukrainas:
“Ndoshta për grurin, Ukraina njihet si një prej shteteve që eksporton më shumë grurë, por Kosova nuk ka eksportuar nga Ukraina, pra nuk lidhet direkt nga Ukraina. Kemi edhe shtete të tjera mike si Kroacia, Italia, Bullgaria, Turqia nga edhe ku marrim grurë.”
Të sinkronizuar me konstatimet e qeveritarëve, kanë dalë edhe ata të Shoqatës së Mullisëve të Kosovës.
Kryetari i shoqatës Muhamet Ferzi tha se:
“Në Kosovë ka të instaluar mullinj të mjaftueshëm. Kapacitetet prodhuese në vend janë për 5.5 milionë banorë. Mullinjtë janë të kujdesshëm dhe kanë importuar në kohë të duhur sasitë e nevojshme prej jashtë.”
Populli në panik! I Zbrazë raftet e dyqaneve ushqimore
Në media sociale kanë qarkulluar fotografi të rafteve të zbrazura të dyqaneve ushqimore. Artikujt më të kërkuar në këto orët e fundit janë mielli dhe vaji.
“Popull frikacak. Në luftë kemi qenë e s’kemi dekë unì. Në Kiev, nuk janë zbrazë kaq shumë. Kështu, ua rrisim edhe vetë çmimet” – ka shkruar profesori Agron Gashi. Duket që Gashi ka pasur të drejtë sepse në media u raportua se nga frika e krizës, një qytetar, vetëm për vaj, ka shpenzuar 186 euro.
Nga ana tjetër, zërat opozitarë, të cilët po kritikohen për sjellje të butë karshi pozitës, nuk kanë qenë të rrallë, por as mjaftueshëm të fortë sa e kërkon situata – sipas disa opinioneve. Kryetari i Lidhjes Demokratike të Kosovës (LDK), Lumir Abdixhiku, në një reagim në llogarinë e tij në rrjetin social, e kritikoi qeverinë se po i kalon mbledhjet “si vëzhguese e krizave ekonomike që kanë tronditur vendin”, duke i siguruar masa konkrete për ta zbutur situatën.
“Maqedonia e Veriut pak orë më parë, uli TVSH-në në naftë e në derivate nga 18%, në 10%. Uli dhe akcizën për to. Dhe nuk u ndal me kaq, reduktoj në 0% të gjitha tatimet – e brendshme e doganore pa dallim – në të gjitha produktet bazike ushqimore. E bëri me qëllim që përballja e qytetarëve atje të jetë sa më e lehtë. Hapa të tillë po marrin shtetet një nga një; por shteti ynë megjithatë vështron.”
Ua kujtojmë se vetëm brenda orëve të fundit çmimi i vajit u ngrit deri në 2.29 centë; çmimi i miellit, për 100 kilogramë shkoi deri në 60 euro; si dhe karburanti deri në 1.70 për litër./FolDrejt/
