Ndonëse në vendkalimet në Jarinje dhe Bërnjak kanë vijuar të qëndrojnë barrikadat, nata ka kaluar relativisht e qetë, shkruan Fol Drejt.
Ndërkohë në vendkalimin kufitar në Merdar, komunikacioni po funksionon normalisht.
Qeveria e Republikës së Kosovës po tregohet këmbëngulëse në raport me hapat që ka vendosur t’i marr. Reciprociteti është i domosdoshëm, përderisa Serbia vijon të sillet në raport me Kosovën, siç është sjellë deri më tani – thotë Prishtina zyrtare. Megjithatë e koordinuar me ShBA-të, Republika e Kosovës ka vendosur që ta shtyjë masën e reciprocitetit për 30 ditë, por vetëm pasi të largohen barrikadat në veri.
“Në bashkëpunim me aleatët tanë ndërkombëtarë, ne zotojmë se do të shtyjmë për 30 ditë zbatimin e vendimeve për targat e makinave dhe dokumentet hyrëse-dalëse në pikat kufitare me Serbinë, me kusht që të hiqen të gjitha barrikadat dhe të rivendoset liria e plotë e lëvizjes” – është shprehur Kryeministri Albin Kurti, nëpërmjet një cicërime në llogarinë e tij në Twitter.
Sipas një vendimi të mëhershëm të qeverisë, sot me 1 gusht pritej të zbatohej vendimi i regjistrimit të veturave dhe lëshimit të dokumenteve zyrtare të lëshuara vetëm nga autoritetet e Kosovës. Mediat në serbi sot kanë raportuar se pikërisht ky hap ka shkaktuar tensione, duke i shtyrë qytetarët të vendosin barrikada, si shenjë revolte. Për më shumë ato raportojnë se të katër komunat në veri të Kosovës, janë zgjuar nën parullën: “Mirëserdhe në ZSO” – që e ka domethënien: Mirë se erdhët në Bashkimin e Komunave Serbe!
“Tash e kemi përfunduar takimin në Shtabin e Përgjithshëm, gjenerali Mojsiloviq, para kësaj, foli me komandantin e KFOR-it. Është e rëndësishme që biseda të jetë zhvilluar në një atmosferë korrekte, në mënyrë profesionale dhe të pranohen detyrimet e të dyja palëve, mbi të gjitha, në shkëmbimin e informacionit, sepse kishte shumë të pavërteta dhe dezinformata. Në mesnatë presim një bisedë me komandantin e KFOR-it me Goran Rakiqin dhe përfaqësuesit e serbëve. Kemi kërkuar nga institucionet ndërkombëtare që të ndikojnë që pala shqiptare të shtyjë vendimet para se të takohemi sërish në Bruksel dhe të zgjidhet gjithçka në mënyrë paqësore. Shpresoj se sonte ose nesër situata do të deeskalohet” – deklaroi dje presidenti i Serbisë Aleksandër Vuçiq.
Vuçiq, për më tepër, ka hedhur akuza ndaj Qeverisë së Kosovës, duke thënë se është ajo që e ka planifikuar prej kohësh destabilizimin e situatës, ndërsa Qeveria e Serbisë po provon ta bëjë të kundërtën.
“Nga shërbimi rajonal, shërbimet tjera të sigurisë e deri te mediat e atyre vendeve që akuzuan Serbinë paraprakisht se është e qartë se ne do të pushtojmë një vend gjoja sovran me urdhër të Rusisë, edhe pse sipas akteve ndërkombëtare është vendi ynë”, u shpreh ai, duke mos i fshehur pretendimet e moçme në lidhje me territoret e Kosovës.
Që situata është e tensionuar dhe se mund të eskalojë në konfrontim direkt, e kanë paralajmëruar edhe akterët ndërkombëtarë.
Deputeti i Parlamentit Evropian, Riho Terras, dje tha se Serbia mund ta sulmojë Kosovën. Këtë e bëri të ditur përmes një statusi në Twitter të dielën mbrëma, derisa zhvillimet ne veri të Kosovës i cilësoi shqetësuese.
“Raportimet nga Kosova janë shumë shqetësuese. Serbia po mëson nga vëllai i madh (Vladimir Putin) dhe mund ta sulmojë Kosovën. Ne duhet të qëndrojmë të fortë brenda në NATO”.
Nga ana tjetër, nga KFOR-i kanë bërë të ditur se janë gati për çfarëdolloj situate. Për njohësit e zhvillimeve politike, qytetet e veriut të Kosovës, përherë kanë qenë instrument për destabilizimin e situatës politike në Kosovë nga ana e Serbisë, ndaj është përsëritur një gjë e tillë. Por për Kosovën, përkatësisht qeverinë aktuale, ato janë pjesë të pakontestueshme dhe të patjetërsueshme të saj, ndaj e tëra çfarë po vepron, ka të bëjë me ushtrimin e sovranitetit, në pajtim me kushtetutën dhe aktet e tjera normative./FolDrejt/
