Shefi i Shtabit të Përbashkët të Ushtrisë Amerikane, Mark Milley, tha se kundërsulmi i Ukrainës është më i ngadaltë se sa pritej dhe sipas tij do të vazhdojë edhe për disa javë të tjera dhe pritet të jetë “shumë i përgjakshëm”.
Nuk më habit aspak fakti që po ecën më ngadalë se sa pritej, shtoi ai dhe theksoi se “lufta në letër dhe në terren janë gjëra të ndryshme”.
Duke iu përgjigjur pyetjes se çfarë do të përbënte, nga pikëpamja e SHBA-së, një fitore për Ukrainën, Milley nuk korrigjoi objektivat e deklaruara nga Perëndimi.
“Presidenti i SHBA-së, Sekretari i Shtetit, Sekretari i Mbrojtjes dhe Sekretari i Përgjithshëm i NATO-s po thonë të njëjtën gjë. Ukraina u bë një vend i lirë, sovran dhe i pavarur në vitin 1991 dhe fitorja do të jetë nëse mbetet një vend i lirë, i pavarur dhe sovran, me të gjithë territorin e tij”, tha ai.
Milley deklaroi se vendimi nëse SHBA do të furnizojë Ukrainën me municione thërrmuese, sisteme raketore operacionale-taktike ATACMS ose luftarakë F-16 do të merret nga presidenti Joe Biden.
Ajo çështje është duke u shqyrtuar vazhdimisht, ai proces është në vazhdim dhe vendimin përfundimtar do ta marrë presidenti Biden, tha ai, përcjell Fol Drejt.