Komandanti i Forcave të Përbashkëta të Ukrainës, gjenerallejtënant Serhiy Niaev është i bindur se e vetmja garanci për të penguar Rusinë nga agresioni i ardhshëm është pranimi i Ukrainës në NATO dhe forcimi i vazhdueshëm i Forcave të saj të Armatosura. Deklarata erdhi në një intervistë për RBC-Ukraine ndërsa Naieve foli për vizionin e tij për t’i dhënë fund luftës dhe garantimin se Federata Ruse nuk do të sulmojë më Ukrainën, transmeton Ukrinform, përcjell Fol Drejt.
“Memorandumi i Budapestit, i nënshkruar në dhjetor 1994, tregoi se çdo marrëveshje ndërkombëtare mund të shkelet. Prandaj, unë shoh anëtarësimin e Ukrainës në NATO, si dhe forcimin e vazhdueshëm të Forcave të saj të Armatosura, si garancinë e vetme për të penguar agresionin rus në të ardhmen. Dhe nuk duhet të harrojmë kurrë thënien “Nëse doni paqe, përgatituni për luftë.” Me fjalë të tjera, vetëm një ushtri e fortë dhe profesionale mund të garantojë paqen dhe qetësinë për vendin tonë”, tha Naiev.
Duke folur për mënyrën se si duhet të përfundojë lufta, Komandanti i Forcave të Bashkuara vuri në dukje se fundi i saj duhet të përfshijë ruajtjen e integritetit territorial të Ukrainës, si dhe krijimin e kushteve për të parandaluar agresionin e ardhshëm nga ana e armikut.
“Personalisht, për mua, fundi i luftës ka të bëjë me përmbushjen e kushteve nga shteti agresor që përmban “formula e paqes” e paraqitur nga presidenti i Ukrainës. Jam i sigurt se përmbushja e të 10 pikave të pasqyruara në formulë do të ofrojë një mundësi jo për një armëpushim të përkohshëm, por për krijimin e kushteve, në të cilat Rusia nuk do të jetë në gjendje të zbatojë planet e saj në të ardhmen, tha ai.
Sipas Naiev, për t’i dhënë fund luftës, është e nevojshme të forcohet izolimi ndërkombëtar i Rusisë. Bëhet fjalë për presion ekonomik në formën e sanksioneve ndërkombëtare, duke i privuar rusët nga aleatët me ndikim, të cilët do të ishin në gjendje t’u ofronin atyre ndihmë ushtarake dhe ekonomike. “Vetëm bashkimi i të gjitha kombeve të qytetëruara të botës në luftën kundër agresorit rus do të jetë në gjendje të ndalojë luftën në Ukrainë”, theksoi komandanti i Forcave të Bashkuara.
Sipas bindjes së tij, lufta do të përfundojë jo vetëm kur ushtari i fundit rus të largohet nga toka ukrainase, por kur armiku të kuptojë se njerëzit që kërkojnë të jetojnë në një shtet të lirë nuk mund të mposhten.
Siç është raportuar, numri i vdekjeve të ushtrisë ruse në Ukrainë deri më 20 mars arriti në 165,610. /FolDrejt/
