Këto ditë po kujtohet një ndër masakrat më të mëdha të fundshekullit të kaluar, që shënjojnë ndarjen e përgjakshme të konfederatës jugosllave. Masakra e Srebrenicës, në të cilën u ekzekutuan mbi 8000 boshnjakë, është një ndër rastet më tmerruese që dëshmon për impotencën ndërkombëtare të drejtësisë, shkruan Fol Drejt.
Familjarë, qytetarë, aktivistë, e politikanë të vendit, rajonit e ndërkombëtarë, janë duke e kujtuar këto ditë njërën prej masakrave të mëdha të luftërave të fundit ballkanike.
Gjenocidi i Srebrenicës ose Tragjedia e Bosnjës është një krim lufte i zbatuar në korrik të vitit 1995 në Bosnje dhe Hercegovinë. Mbi 8,000 boshnjakë muslimanë, kryesisht burra dhe djem të moshës 12 deri 77 vjet, ishin viktima të kësaj masakre.
Gjenocidi është zbatuar në rajonin e Srebrenicës nga Ushtria e Republikës Serbe (VRS) nën udhëheqjen e gjeneralit famkeq Ratko Mlladiq, duke përfshirë njësinë paraushtarake “Škorpioni” (sq. Akrepat), e cila ishte pjesë e Ministrisë së punëve të brendshme të Serbisë si dhe disa qindra vullnetarë grekë dhe rusë.
Dje gjenocidin në Srebrenicë e ka kujtuar edhe Kryeministri i Republikës së Kosovës Albin Kurti.
“Ajo që mund të bëjmë ne si Kosovë është shumë pak, por jo asgjë. Dy vite më parë në Kuvendin e Republikës sonë kemi miratuar një rezolutë me të cilën dënohet gjenocidi në Srebrenicë dhe ftohet Qeveria e Kosovës të nderojë viktimat dhe kujtimin e kësaj date” – ka thënë ai.
Ua kujtojmë se Gjykata Ndërkombëtare e Hagës ka marrë vendimin që masakra e Srebrenicës të njihet si gjenocid (popullvrasje)./FolDrejt/
