Gjermania i ka kërkuar Zvicrës t’i shesë disa nga tanket e saj Leopard II, në mënyrë që të mund të ndajë më shumë ndihmë ushtarake për Ukrainën, raportoi gazeta zvicerane Blick.
Siç shkruan Blick, Gjermania i kërkon Zvicrës që t’i shesë disa tanke të saj prodhuesit Rheinmetall, për të mbushur boshllëqet në armatimin e anëtarëve të Bashkimit Evropian dhe NATO-s.
Gjermania, Polonia, Portugalia, Finlanda dhe Suedia janë ndër vendet që dërgojnë leopardë në Ukrainë, por duke e bërë këtë ata kanë holluar arsenalin e tyre ushtarak. Ministri gjerman i Mbrojtjes Boris Pistorius dhe ministri i Ekonomisë Robert Habeck informuan ministren zvicerane të Mbrojtjes Viola Amherd për qëllimin e tyre në një letër të datës 23 shkurt, sipas Blick.
Ata po i kërkojnë Bernit të pajtohet me shitjen, me një premtim se tanket zvicerane nuk do të përfundojnë në Ukrainë, përcjell Fol Drejt.
Kërkesa gjermane po shqyrtohet
Ligjet e neutralitetit dhe një embargo armësh e pengojnë Zvicrën që të dërgojë armë direkt në Ukrainë dhe pajtimi me kërkesën e Gjermanisë do të kërkonte që parlamenti zviceran t’i shpallte zyrtarisht tanket jashtë shërbimit, shpjegon gazeta.
Ministria zvicerane e mbrojtjes tha se kërkesa gjermane po shqyrtohej. “Nga pikëpamja ushtarake, në parim, duke marrë parasysh nevojat e Zvicrës, do të ishte e mundur që të heqësh dorë nga një numër më i vogël tankesh,” tha një zëdhënës i ministrisë.
Në rastet e mëparshme, Berna refuzoi kërkesat nga Gjermania, Spanja dhe Danimarka për të eksportuar municion zviceran të blerë më parë në Ukrainë. Çështja e eksportimit të armëve zvicerane në zonat e luftës në Zvicër është gjithnjë e më përçarëse, pasi rritja e mbështetjes publike dhe politike për Ukrainën i bën shumë presion Bernës./FolDrejt/
