“Kjo luftë është lufta e Putinit”, tha kancelari Olaf Scholz duke shtuar se sanksionet e BE-së duhet të shënjestrojnë presidentin Putin dhe ata që janë të interesuar për luftën në Ukrainë.
Gjermania sot ka hedhur poshtë thirrjet në Bashkimin Evropian për ndalimin e vizave turistike për qytetarët rusë, duke theksuar se sanksionet nuk duhet të dëmtojnë njerëzit e pafajshëm, shkruan AA, transmeton Fol Drejt.
“Kjo luftë është lufta e Putinit”, tha kancelari Olaf Scholz në një konferencë për media në Berlin, duke shtuar se sanksionet e BE-së duhet të shënjestrojnë presidentin Putin dhe ata që janë të interesuar për luftën në Ukrainë.
“Kemi miratuar sanksione konkrete kundër shumë zyrtarëve rusë, oligarkëve dhe grupeve të fuqishme në Rusi dhe sigurisht që do të vazhdojmë të ndërmarrim hapa të mëtejshëm”, tha ai.
“Por, nëse ne tani i shtrijmë këto masa për të gjithë, përfshirë njerëz plotësisht të pafajshëm, atëherë kjo do të zvogëlonte efektivitetin e këtyre sanksioneve”, shtoi Scholz.
Në fillim të kësaj jave, Finlanda dhe Estonia u bënë thirrje anëtarëve tjera të BE-së që të ndalojnë lëshimin e vizave turistike për qytetarët rusë, si përgjigje të luftës së Rusisë kundër Ukrainës.
“Të vizitosh Evropën është privilegj, jo një e drejtë njerëzore”, shkroi të martën kryeministrja estoneze Kaja Kallas dhe argumentoi se tani është “koha për t’i dhënë fund turizmit nga Rusia”.
Ministri i Jashtëm i Finlandës, Pekka Haavisto konfirmoi se qeveria po planifikon të shtrëngojë rregullat e vizave për qytetarët rusë dhe do ta ngrejë këtë çështje gjatë një takimi të ministrave të Jashtëm të BE-së të planifikuar për në fund të këtij muaji./FolDrejt/
