Kancelari gjerman Olaf Scholz kujtoi të hënën viktimat e një sulmi me zjarrvënie raciste të vitit 1993 në Solingen, i cili la të vdekur pesë anëtarë të një familje turke, raporton AA, përcjell Fol Drejt.
“Ishte një ditë e zezë në Solingen 30 vjet më parë,” shkroi Scholz në Twitter dhe nënvizoi se është detyrë e shtetit të mbrojë emigrantët dhe të ndëshkojë krimet raciste.
“Vrasja e pesë personave me rrënjë turke nga ekstremistët e krahut të djathtë na kujton se ne duhet të mbrojmë të gjithë ata që jetojnë këtu, të ndëshkojmë krimet dhe të ndihmojmë viktimat,” tha ai.
Scholz bëri thirrje për respekt ndaj njerëzve nga kulturat e tjera dhe nënvizoi rëndësinë e mbrojtjes së diversitetit socio-kulturor të Gjermanisë.
Shtëpia e familjes emigrante turke në Solingen u dogj në vitin 1993 nga neo-nazistët mes pakënaqësive në rritje kundër të huajve në vend pas bashkimit të Gjermanisë Lindore dhe Perëndimore.
Nga zjarri mbetën të vrarë tre vajza, Saime Genc, Hulya Genc dhe Gulustan Ozturk dhe dy gra, Hatice Genc dhe Gursun Ince, ndërsa 14 të tjerë u plagosën, mes tyre disa fëmijë.
Policia arrestoi katër ekstremistë të djathtë pas zjarrvënies, të cilët u dënuan me 10 deri në 15 vjet burg.
Të paktën 213 njerëz janë vrarë në Gjermani nga dhuna neo-naziste që nga viti 1989, sipas organizatës për të drejtat e njeriut Amadeu Antonio Foundation.
Racizmi mbetet një problem i madh në vend, pasi shifrat zyrtare tregojnë një rritje të krimeve të ekstremit të djathtë në vitet e fundit.
Ekstremistët e krahut të djathtë kryen 1,170 sulme të dhunshme vitin e kaluar duke synuar emigrantët, refugjatët ose kundërshtarët politikë. Të paktën 675 persona u plagosën në ato sulme. /FolDrejt/
