Gjermania të enjten shkatërroi shpresat e Ukrainës për të marrë një perspektivë të qartë anëtarësimi nga aleanca e mbrojtjes e NATO-s brenda këtij viti, raporton AA, përcjell Fol Drejt.
“NATO e ka bërë gjithmonë të qartë se ka një politikë të dyerve të hapura [për Ukrainën] dhe është gjithashtu e qartë se në mes të një lufte, ne nuk mund të flasim për një anëtarësim të ri,” u tha gazetarëve ministrja e Jashtme gjermane Annalena Baerbock në takimin e ministrave të jashtëm të NATO-s në Oslo të Norvegjisë.
Megjithatë, Baerbock mbrojti idenë për një bashkëpunim më të fortë të mbrojtjes dhe theksoi se Gjermania dhe aleatët e saj të NATO-s do të vazhdojnë të ofrojnë mbështetje ushtarake për Ukrainën.
“Lufta ruse e agresionit ka treguar sërish rëndësinë e mbrojtjes. Dhe për shkak të luftës së agresionit rus, bashkëpunimi me Ukrainën dhe NATO-n është intensifikuar”, tha ajo.
Ministri i Mbrojtjes i Ukrainës Oleksiy Reznikov deklaroi muajin e kaluar se ata shpresojnë të marrin një perspektivë të qartë anëtarësimi nga NATO gjatë samitit të ardhshëm të aleancës në Vilnius në korrik.
Rusia ka paralajmëruar vazhdimisht se konflikti mund të përshkallëzohet në një luftë botërore nëse Ukraina do të pranohej në aleancën ushtarake të udhëhequr nga ShBA.
Ukraina paraqiti zyrtarisht kërkesën e saj për anëtarësim të shpejtë në NATO shtatorin e kaluar, pas aneksimit nga Rusia të katër rajoneve të Ukrainës. /FolDrejt/
